Dibrugarh, Iaiong 11: Ka kynhun ki nongsaid ain na ka Shiromani Gurdwara Parbandhak Committee (SGPC) ki la wan poi ha Dibrugarh, Assam hynnin ka sngi Nyngkong na ka bynta ban iarap ia kito ki samla kiba dei na Punjab kiba la shah kem bad shah set phatok hapoh ki kyndon ka National Security Act (NSA).
Ha ki jingjia ba dang shen, ki bor pulit ka Punjab ki la pynlong ka jingkhynra pyrshah ia u nongialam uba kyrshan na ka bynta ka jinglaitluid jong ka Khalistan u Amritpal Singh kumjuh ia ki nongkyrshan ki jong u.
Ki la don haduh phra ngut ki briew kiba la shah kem bad shah set hapoh ka phatok ha Dibrugarh hadien ba ki la shah pynngat hapoh ki kyndon jong ka National Security Act (NSA), bad bun ngut kiwei pat ki la shah kem noh.
Ka kynhun jong ki nongsaid ain kaba kynthup ia ki dkhot ka SGPC, kata u Advocate Bhagwant Singh Sialka, Sandeep (Deep) Singh u para jong u Sidhu u Advocate Mandeep Singh Sidhu bad u Advocate Rohit Sharma ki la shah pynkhamti ha kaba iadei bad kane ka kam ban aijingiarap na ka bynta jong ki lyngba ki lynti jong ka ain.
Kumba la pynpaw da ka kynhun jong ki riewsaid ain, na ka liang kiba haiing hasem jong kitei ki phra ngut kiba la shah kynnoh donkti ruh ki la shaniah ha kane ka kynhun ki nongsaid ain ha kaba iadei bad kane ka juh ka bynta.
Na ka liang ka Dibrugarh District Legal Service Authority ka la thing ia u Advocate Samir Kr Todi kum u Legal Aid Counsel na ka bynta kitei kiba la shah donkti kiba la shah set hapoh Dibrugarh Central Jail.
“Katei ka kynhun na Punjab da ka jingiarap jong u Legal Aid Counsel, u Advocate Samir Kr Todi ki la sdang ban iaid shakhmat ha kaba iadei bad katei ka kam hynnin ka sngi” Ong u Advocate Bhagawant Singh Sialka.
