Shillong, Iaiong 10: Ha ka jingpynpaw kaba kham pher da u Myntri Rangbahduh (PM) Narendra Modi ha kane ka sngi U Blei ba la lah, u Modi u la leit iashim bynta ha ka jingiaseng ba kyrpang ha Sacred Heart Cathedral ha New Delhi shibynta jong ka jingrakhe Easter, kata da kaba iashim bynta ha ka jingduwai, ka jingthang mombati bad wat ka jingthung tynrai dieng shibynta jong ka jinglehniam ba kyrpang jong ki paid riewngeit Khristan ha satlak ka pyrthei.
Katei ka jingleit iashim bynta jong u Modi kaba dei ka sien kaba nyngkong da u PM naduh kine ki khyndiat por ba la dep ha ka jingrakhe Easter ka la pynlyngngoh ia kiba bun ki paid riewngeit Khristan, bad kaba la pynpaw ruh ia ka jingbym lah shemphang halor ki jingmut hapdeng ki rit paid ha kaba iadei bad ka seng BJP bad halor ki jingleh jingkam ki jong ka khamtam hadien ki jingjia shah thombor ba khah khah jong ki rit paid bad ki jaka mane Blei ki jong ki.
Katba kiba bun na ki paid Khristan ki la ai ka jingiaroh bad pdiang burom ia kane ka jingwan iashim bynta jong u PM Modi ha kane ka jingrakhe lehniam, hynrei kiwei pat kim shym la sngew da kumta.
Ki nong kynthoh pyrshah ki la shim ia kane tang kum ka jingleh mynleh da kaba phaikhmat sha ka ilekshon ka ban wan ha Karnataka ha kaba ki rit paid, kaba kynthup ia ki Khristan ki dei kiba don ha ki katto katne ki thain.
Ki la ong ruh ba ka la don ka jingpyrshang ban ioh jaka hapdeng ki kynhun khristan ha Kerala ha kaba ka BJP ka la shah ktah jur ha ki ilekshon ba la dep ha ki kynhun communist ha kaba kam shym la ioh satia ia ka jingkyrshan da ki kynhun rit paid.
Hynrei, na ka bynta kiwei pat, kane ka jingwan iashim bynta ha ka Easter Sunday ka dei ka khubor ka jingpyrto bad ka jingiaroh kaba khlain jong ka BJP halor ka jingdon bynta jong ki nongshong shnong kiba dei ki Khristan ha ka ban tei ia ka ri.
Nalor kata, ka BJP ka sngewthuh ruh halor ka jinglong kongsan jong ki niam Khristan ha ki jylla ka thain shatei lammihngi (northeast) kum ha Meghalaya bad Nagaland ha kaba kane ka saffron party ka la ioh ia ka lad ban iasam lang ia ka bor synshar ha ki por kiba la dep bad ha kane ka jinglong jingman sain hima sima kaba mynta.
Watla kata, la ka long ha kano kano ka rukom, kata ha ki kam sain hima ne da kumwei pat, hynrei na ka bynta ki paid Khristan hapoh ka ri baroh kawei ka Easter ka dei ka jingrakhe jong ka jingkmen namar ka jingmih pat jong u Trai Jisu Khrist bad ka jingngeit halor ka jingsuk bad ka jingmab bad ka jingialong kawei.
Ban ia don bynta lang ha ka jaka shong hapoh ka iingmane bad u PM jong ka ri ka pynpaw ba haduh katno ka jinglong ba kongsan jong ka sngi Easter.
