Shillong, Iaiong 09: U Lat ka Jylla u Phagu Chauhan hynne ka sngi ula pynher lama iaka rally kali arshaka ki shipai lane ka ‘Rhino Riders’ bala pynlong daka 101 Area of Eastern Command jong ka Indian Army ka ba la sdang na Rhino Training Complex Shillong.
Ia kane ka Rally la pynlong kum shibynta ban rakhe iaka Jubilee ksiar jong ka 101 Area ka ba la sdang haka 22 tarik Iaiong 1963 haka thma bah 1962.
U Lat ka jylla u Phagu Chauhan ula iaroh iaka 101 Area ka ba long kyrpang haba iadei bad ka jingtreikam khamtam ha ka por ka thma 1962 ban iada iaka thain shathei lammihngi
U Lat ula pynkynmaw ruh iaka jinglah ka 101 Area napdeng kiwei ki shipai ka ri India khamtam haka 16 tarik Nohprah 1971 haba iadei bad ka thma naka bynta ban pynioh laitluid iaka ri Bangladesh.
Ula iaroh iaka jinglah ka 101 Area haba iadei bad ka jinglah ban pynbit pynbiang haba iadei bad ki jingdonkam haka por thma.
Ula iaroh iaka kynhun niah kali arshaka kiba la shim bynta ha kane ka jingniah thuk thuk bad ula ong ba kane kan nang ai mynsiem iaki samla ka ri ban thep kyrteng ban long shipai hadien habud.
Iaka kynhun ‘Rhino Riders’ la lamkhmat da u Col Pankaj Chaturvedi jong ka HQ 101 Area bad kane ka kynhun kan sha Meghalaya, Assam, Mizoram, Manipur, Nagaland and Arunachal Pradesh bad kan shim bynta haka jingrakhe iaka ‘Azadi ka Amrit Mahotsav’.
