Shillong, Iaiong 9 : Ka Iingkashari Meghalaya High Court ha ka hukum ba pynmih ha ka 5 tarik Iaiong, kala kyntait ia ka jingpan bah jamin jong u MLA barim ka Mawhati bad Chairman barim ka HNLC Julius K Dorphang, uba la shah set phatok haduh 25 snem namar ka jingleh beijot ia ka Khynnah rit.
Une u MLA barim ka Mawhati ula shah pynshitom da kaba shong phatok haduh 25 snem bad ka kun aba T. 15 lak ha ka Iingkashari Special Court jong ka Ri-Bhoi District namar ka jingle beijot ia kawei ka khynnah ha u snem 2017 mynba u dang long MLA.
Haba kyntait ia ka jingkyrpad, ka Principal Bench ba kynthup ia u Chief Justice Sanjib Banerjee bad Justice W Diengdoh, ha ka hukum, kala ong ba u Bah Julius ula don 52 snem ka rta bad “Da ka jingpynngat shong phatok haduh 25 snem, ka Iingkashari ba bishar kala pynthikna ba shuwa ka por ba une u Nongpan jamin un lait na phatok, ka jingkwah brai ka met kan nym don shuh ha une u briew namar ka jingheh rta. Un nym lah shuh ban leh ia ki kam awria”.
“Ka Jylla ruh kan hap shim jingkitkhlieh ban kitkhia ia baroh ki jingsumar jong ka lanot ba lait im khlem ka jingsiew pisa khyndiat ruh, ka ban iaryngkat bad ka kyrdan Grade-II officer ka Jylla ha kine ki 20 snem ban wan” ong ka Iingkashari.
Ka ong ruh ba ka kuna, lada lah siew, bad ka song pisa ba la mang baroh kum ka bailutksan ka bym dei ban duna ia ka T. 20 lak, dei ban ai da ka Jylla sha ka lanot da kaba kynshew ia ka ha kata ka rukom tad haduh ba ka rta ba kala lah ban pyniaid kam. Ka Jylla kan hap ban siew ruh T. 5 lak sha ka lanot kum ka bailutksan nalor ka T. 15 lak ba ka ioh na ka kuna.
Nalor kane, ka Iingkashari kala bthah ruh lada don kano kano ka prokram ba kyrpang lane ka lad iohkam kaba don lane ka kam kaba ka lanot ka lah ban trei lane lada don kano kano ka education prokram ia ki Kynthei kaba lah ban pynrung ia ka lanot, ka Jylla ka dei ban ai ia baroh ki jingiarap ia kane ka lanot khnang ba kan lah ban im ia ka jingim kumba long lang kiwei kiwei.
