Agartala, Iaiong 08: Ban kyntiew ia ki kam khaii pateng jong ki trai shnong bad ia ka ioh ka kot jong ki nongshong shnong kiba shong ba sah ha ki thaiñ khappud ka Tripura bad ka Bangladesh, na ka liang ka sorkar India ka la rah ia ka mat na ka bynta ban plie biang ia ki artylli ki ïew khappud ne ki ‘Border Haat’ ha khappud ka Tripura.
Ka Myntri khynnah ka sorkar pdeng kaba khmih ia ka tnat Commerce and Industry, ka Anupriya Patel ka la ong ha ka shithi sha u Myntri Rangbah (CM) barim ka Tripura u Biplab Deb ba ka jingpyntreikam ia ki iew khappud ha Kamlasagar kaba hapoh Sepahijala district bad ha Srinagar ha South Tripura district la pynsangeh noh shipor namar ka jingsaphriang jong ka jingpang Covid-19.
“Ngi dang iai bteng ban rah ia ka mat kaba iadei bad ka jingthmu ban plie biang ia ki jaka iew khappud ha Kamlasagar bad Srinagar ha ki jingialang bad ki nongialam ka Bangladesh.Ngi kyrmen skhem ba shen yn lah ban weng ia kine ki jingeh kiba iadei bad kane ka bynta,” ong ka Patel ha ka shithi sha u Deb, uba dei mynta u dkhot ka BJP hapoh Rajya Sabha.
Ia ki saw tylli ki jaka iew khappud, kata mar artylli ha Tripura bad Meghalaya la khang khyrdep noh naduh u bnai Lber 2020 hadien ka jingsaphriang jong ka jingpang Covid-19 bad hadien ka jingpynjari ia ki jingkhangdam kaba la wanrah ka jingduh nong kaba khraw ia ki nongshong shnong kiba don ha ki thain khappud.
