Shillong, Iaiong 06: Ka Khasi Students Union (KSU) hynne ka sngi kala dawa na ki bor district ka East Khasi Hills ban pynshitom iaki dkhot jong ka Vishva Hindu Parishad (VHP) Shillong kiba la pynwit iaka jinglong jingiaseng da ka ba pynlong iaka jingiaid paidbah haka 2 tarik mynta u bnai kaba hap haka sngi U Blei.
Ka KSU kala ai ruh daka dorkhas sha u Deputy Ccommissioner (DC) ka East Khasi Hills u S.C Sadhu naka bynta ban leh eiei halor kane.
“Ngi dawa na ki bor district ban shim ia ka sienjam pyrshah iaki dkhot ka VHP kiba la pynlong iaka jingiaid paidbah namar kine kila leh palat daka ba hala ban pyrshah pynkhluid iaka jingiapher niam bad ngi dawa ruh ban shim sienjam pyrshah iaki Pulit kiba khlem lah ban leh eiei pyrshah iaki dkhot ka VHP kiba la hala bad pyrta hakhmat ka ïing mane” la ong u president ka KSU Circle Reuben u samla Najiar.
U samla Reuben ula ong ba ia kane ka jingthmu pynshit niam ki dkhot ka VHP la sakhi lyngba ki Video bala saphriang ha ki lad pathai khubur bad kine ki Video ki paw shai ba kine ki dkhot ka VHP kila pynwit iaka shong shong shngain hapoh ka nongbah.
“Kane ka jingiaid paidbah ki dkhot kadei tang ban pyni bor ba ka niam jong ki ka kham heh ne kham kor dor ia iaka niam kiwei” ula ong.
U samla Reuben ula iathuh ba katba ka jingiaid paidbah kala poi ha Red Cross bad sha Laban Iewdak kine ki dkhot ka VHP kiba la don da ki spah ngut kiba la iaid daki kali arshaka kila sangeh hakhmat ka ïing mane Laban Presbyterian Church haka por 1 Nohphaisngi bad kila pyrta ‘Jai Sree Ram’ bad kiwei ki kyntien kuba 10 minit watla ka jingiaseng hapoh ka ïing mane ka dang iaid bad kane kala pynlong ka jingkhniuh iaki ba don haka jingiaseng.
“Kane baroh kadei tang ka jingthmu ban pynthut iaki riewngeit Khristan jong ka jylla bad ka jingthmu ban kadei hi tang ban pyntieng iaki Riewngeit Khristan bad kiwei ki niam kiba don hapoh ka jylla bad kaba kam sniew ka long ba kine ki dkhot ka VHP kila pyrta ruh ba ki don ka thong ban pykylla iaka Meghalaya kum ka jylla ka niam Hindu” ula ong.
U samla Reuben ula ong ba ka long kaba snegwsih ban iohi ba wat ki Pulit ka Laban PS ruh kim lah leh eiei bad ki shu peit kai katba kine ki dkhot kla VHP kila pyntieng bad pynsmiej iaki ba wan jingiaseng bad ia kiwei kiba iaid ha ki surok.
“Donkam ban pynrem ia kane ka jingbym lah leh eiei ki Pulit ka Laban PS bad donkam ruh ban leh eiei pyrshah ia kine ki Pulit” ula ong.
Ula iathuh ba haka dorkhas, ka KSU kala ujor sha u DC ba kine ki dkhot ka VHP kila pynwit ruh ia kiwei kiba thmu ban leit jingiaseng sha St. John Parish hynrei donbok hadien katto katne por ki rangbah na kane ka thain kila lah ban tem noh ia kine ki khot ka VHP.
U samla Reuben ula iathuh ba ka jinglehniam ‘Ram Navami’ kadei haka 30 tarik Lber ha baroh kawei ka ri India hynrei kaba sngew thamula ka long ba ia kine dkhot ka VHP la shah ban iaid paidbah kaba 2 tarik mynta u bnai kadei ruh ka sngi U Blei bad kane ka paw shai ba kane kadei tang ka buit ban pyntieng iaki riewngeit Khristan.
“Hadien kane ka jingiaid paidbah kadei ka seng kala ioh jingtip ruh ba ka lah ban don biang ka jingiaid paidbah bad naka liang ka seng ka kyntu iaki bor district bad iaki Pulit ban long kiba husiar. Naka liang ka seng ka burom ia baroh ki jaitniam hynrei kam kwah ban iohi ba kiwei ki niam kin iuh roit pat ia kiwei ki niam kaba lah ban wanrah iaka jingiasngewpher jaidbynriew” ula ong.
U la pyntip ruh ba ka ki riewngeit Khristan kin rakhe iaka Good Friday bad iaka Easter Sunday haka 7 bad 9 tarik mynta u bnai bad ka seng ka dawa na ki bor district bad ki Pulit ban long kiba husiar ban lait na kano kano ka jingjia ba sngewsih.
