Shillong, Iaiong 04 : Ka Achik Conscious Holistically Integrated Krima (ACHIK) hynne ka sngi ba-ar ka pyntip baka Vice President ka seng Greneth M Sangma kala leit ban mudui da ka mukotduma Public Interest Litigation (PIL) hapoh ka Iingkashari Meghalaya High Court na ka bynta ban ai jingiada ia kano kano ka jingpyrshang ban leh shiliang ia ki paid Garo ha Jylla.
Ka pyntip ba kane ka mukotduma ka long ruh na ka bynta ban iada pyrshah ia ka jingniew bein bad ka jingma pyrshah ia ka Jaidbynriew Garo kiba im ha Jylla Meghalaya bad khamtam ha Shillong namar ka kam kaba iadei bad ka Roster System bad ka jingpyntreikam ia ka Reservation Policy.
Haka kyrwoh, ka ACHIK kala ong ba ka Iingkashari kala ai ka jingkular ba lada don kino kino ki jingpynthut lane ka jingmih ka jingsngew iapher jaidbynriew, ka Iingkashari ka long kaba kloi ban shong bishar ia ka mukotduma hynrei naba ia mynta ka dang mih tang ki jingiakren bad kam pat don kano kano ka kam bala leh halor ka jingsngew iapher jaidbynriew da kano kano ka kyndon lane ki riew shimet, kumta ka Iingkashari kala buhteng ia ka kam.
Ka ACHIK ka ong ba ha ka mukotduma bala mudui da ka Greneth M Sangma ka dei ka bym pat pdiang satia hynrei la ailad pat ban wan bad pyntip sha Iingkashari lada mih kino kino ki jingjia hadien habud. Ka Iingkashari kala ai jingkular ba ka roster system kan ym don jingktah satia nab aka dei kaba la leh khlem ka jingleh shiliang.
Pule lang ia kane: Sikkim: Iap 7 ngut ki Nongshangkai pyrthei ba twa u lum thah ha Nathula
