Nongstoin, Lber 31 : Ka Federation of Khasi & Jaintia People (FKJGP)-West Khasi Hills, kala dawa ia ka Sorkar Jylla ba kan pyrkhat thymmai bad shong bishar biang ia ka Memorandum of Understanding (MoU) bala iasoi hapdeng ka Meghalaya bad Assam ban iapynbeit pud namar ka jingshah thombor ki nongshongshnong ka Malchapara ha ki Pulit ka Assam.
Kane ka jingdawa kala mih hadien ka jingshah kem ki arngut ki Nongshongshnong ka Malchapara ha ki Pulit Assam dang shen bad ka jingshah thwet ki arphew san ngut ki briew kynthup ia lain gut ki Longkmie katei ka Shnong.
U President ka FKJGP-WKH Bah Chandra Nongdkhar haba iakren bad ki nongthoh khubor, ula kynnoh ba ka Sorkar kam shym la khein kor satia ia ka kaiphod bala phah da ka Regional Committee jong ka West Khasi Hills.
Kat kum ka jingong jong u, ka Seng ka sngewkhia jur ia ka jingshah thwet ki arphew san ngut ki Nongshongshnong ka Malchapara kiba la hap ban wan rieh ha ka Ophis jong ka Hima Nonglang kaba don ha Langdongdai. Ula ong ba kine ki briew kila sheptieng ban leit phai sha la ki jong ki Iing ki sem namar ka jingthwet khlem sangeh jong ki Pulit ka Assam.
“Ka Seng kam lah ban shu sngap jar ia ka jingeh ki paidbah ha Khappud. Ka Seng kan kyrshan borbah ia ka jingthmu ban iakhih jong ki paidbah na ki shnong Khappud, kaba la buh ban pynlong ha ki sngi ban dang wan ha Nongbah Shillong” ula ong.
Ha kajuh ka por, ka Seng kala dawa ia ka Sorkar MDA-II ba hashuwa ba kan sdang ia ka jingiakren pynbeit pud jong ka wat kaba ar, ka dei ban lum lang ia ki Syiem, ki Sordar bad ki Rangbah Shnong ban pan jingmut halor ka jingkwah jong ki bad ka jinglong jingman ka synshar khaddar kat kum ki pud ki sam jong ki Hima bad ki Shnong, khnang ba kan nym wanrah shuh ia ka kynrum kynram bad ka huri hura kumba ka long ha kine ki sngi ba la dep.
