Agartala, Lber 30 :Ha kawei ka jingjia kaba pynkyndit ia kiba bun, u MLA ka BJP ha Tripura u Jadab Lal Nath uba mihkhmat ia ka Bagbasa constituency la lap katba u dang pynlut por ha kaba peit phlim kynshlein ha ka por ba ka dorbar assembly ka dang iaid shakhmat.
Mynta kane ka video jong une u nongmihkhmat ka BJP ka la saphriang lyngba ki social media.
U Jadab Lal Nath uba dei u nongtrei ka CPI(M) u la pyniasoh sha ka BJP shwa ka snem 2018.U Nath u la iakhun ia ka ilekshon ha u 2018 pyrshah ia u kyrtong ka CPI(M) uba dei ruh u Lamphang barim u Ramendra chandra Debnath hynrei u la shah rem noh, hynrei mynta u snem 2023 u la iakhun biang ha ka ilekshon assembly kaba dang shu dep shen na Bagbasa Assembly constituency jong ka North district ka Tripura ha kaba u la ioh ia ka jingjop.
Ki tyllong khubor napoh ka Tripura legislative Assembly ka pyntip ba kane ka jingjia ka la jia ha ka sngi kaba ar jong ka dorkar assembly ha ka sngi Nyngkong ba la lah.
Hynrei, kane ka video jong une u MLA uba peit phlim kynshlein ka la saphriang lyngba ki social media naduh hynnin ka miet sngi ba Balang ba la lah.Katkum ka video la iohi ia une u MLA uba dang bat ia ka tablet katba ka phlim ka dang iaid shakhmat.
Kiba bun ki nong pyndonkam social media ki la kynthoh tyngeh ia une u MLA da kaba ong ba ka long ka jinglehrain kaba khraw ba u nongmihkhmat ba la jied da ki paidbah un leh ia kiba kum kine ki kam poh ha ka por ba ka jingialang dorbar ka dang iaid shakhmat.
Hynrei, hadien kiba bun ki jingpyrshang, kam shym la don kano kano ka jingpynpaw na ka liang u Lamphang jog ka iingdorbar assembly u BiswaBandhu Sen.
