Shillong, Lber 27: Ka long kaba sha-iong bad ki paidbah kim lah ban mutdur ban sakhi da la ki jong ki khmat ia ka jingthiah iap jong kawei ka skei hapoh ka jaka set jong ka Tura Zoo kaba don ha Nehru Park khlem da don mano mano ruh ban shimkhia ha kaban pynkhuid ia kane ka met na kane ka jaka.
Katei ka skei kaba la iap ha ka jaka set ka jong ka kadei ka jait skei kaba la sdang ban duhjait na ka sla pyrthei bad ki nong jngohkai kiba la leitkai, kila kyndit ban iohi ia katei ka skei kaba la iap noh bad ym shim la don satia mano mano ruh kiban weng noh ia ka na katei ka jaka set.
Kane ka dei tang kawei napdeng ki jingjia kaba ki paidbah kila ioh ban sakhi da la ki jong ki khmat ia ka rukom long jong katei ka Zoo.
Nalor ba katei ka skei kala iap ha ka jaka set, kaba kham isaitmet ka long ba kala sdang ban pyut bad ym shim la don ki ban weng ia katei ka skei ne ban pynkhuid ia katei ka jaka watla ka don sa kawei ka skei kaba la set lang ha katei ka jaka bad ka dei hi sa tang kane ka skei kaba don hapoh katei ka Zoo.
Kaba kham kyndit shuh shuh, ka long ba bun ki jaka set ia ki mrad kiba la sdang ban duhjait, kila sah thylli lut bad kila julor.
Ka jaka kaba la set ruh iaka Dkar kaba la sdang ban duhjait, kala thylli bad wat ka jaka set kaba dei ban buh ia u Himalayan Bear ruh kala sah thylli.
Ula don tang uwei u Myrsiang (Jackal) uba dang im uba la sah ha kawei ka jaka set hynrei ym shim la pynbiang iaka jaka buh um bad une u mrad ula sdang ring tlot namar ka jingshit kyrang ka sngi.
Hynrei tang ka jaka set ia ki shrieh, kadei ka jaka kaba dang long kaba biang hynrei kiba bun hi ki jaka set kila I kumba ym don ki nongpeit ne nongsumar bad kila dap da ki niut ki nier ha ki bynta ba shajrong.
Ka Nehru Park Zoo ha Tura kaba dei tang kane hi ka Zoo ha ka District, kala khring bha ia ki paidbah hynrei namar ka jingbym biang iaka rukom sumar sukher ia ki mrad, kala sdang ban hiar bha bad kala pynlong ruh ia ki briew kiba ieid ia ki mrad bad ia ki paidbah ban kiar ha ka jingleitkai sha katei ka Zoo.
