Nogpoh, Lber 26 : Ka Raid Nongkharai, Khad-ar Lyngdoh jong ka Elaka Nongpoh, Ri-Bhoi District, kala lum ia ka dorbar pyllun ha ka sien ba 12 jong ki 15 tylli ki Shnong ha ka sngi saitjain, ban iasyllok halor ka roi ka par bad ka bha ka miat jong ki Khun ki Hajar bad ki Shnong ki Thaw ba hap hapoh ka Raid.
Ki Longsan mansan bad ki Nongialam Shnong na baroh kine ki Shnong kila wan iashimbynta ha kane ka dorbar pyllun. Kiba la iadon ha kane ka sngi ki kynthup ia u Lyngdoh ka Raid Bah Moses Syngkli, Secretary ka Raid Bah Shephan Maring, Asst Secy Bah Vincent Makri, u Longsan ka Raid Bah Albinus Tmung bad kiwei kiwei.
Haba kren bad ki Nongthoh Khubor u Lyngdoh Raid Bah Moses Syngkli, u la iathuh ba ia kane ka dorbar pyllun ka dei kaba ju pynlong man la u snem bad kane ka dei ka kynti kaba 12 naduh ba u la shimti kum u Lyngdoh Raid bad ka jingthmu kaba kongsan jong kane ka jingialum lang ka long ban iatai ia ki mat kumno ban nang kyntiew ia ki shnong ki thaw kiba hap hapoh ka jingpeit jingkhmih jong ka Raid Nongkharai bad ruh ban peit ia ka bha ka miat jong ki khun ki hajar.
U la iathuh ruh, ba kane ka jingialang kala iatai ruh ia shibun ki mat kiba kongsan kiba kynthup naduh ka jingri sumar ban pynneh pynsah ia ki riti dustur kiba ka Raid ka don, ban pynneh ia ka shongsuk shongshngaiñ, ban ri ban sumar ia ki khlaw ki btap ki dohum dohwah bad ruh kumno ban pynneh ia ki jaka ki puta jong ki 15 tylli ki shnong da kaba bthah ia ki nongialam shnong ba kin nym ailad ia ki nongshong shnong ban die pathar sha ki briew kiba nabar.
Ula pynshai ba ka Raid hi kam khang ia ka jingdie jaka sha kiba nabar hynrei ki trai ki dei ban ailad shwa ia ki trai Raid ban thied ia ki jaka ba thmu ban die.
