Shillong, Lber 23 : U Symbud Myntri Rangbah ba khmih ia ka Tnad PWD (Roads) Bah Prestone Tynsong hynne ka sngi Palei ula pyntip ha Iingdorbar ba ka Tnad kala sdang mynta ia ka jingthied jaka na ka bynta ban pynheh ia ka surok National Highway-6 sha ka surok 4-lane.
Haba jubab ha ka kynta kylli jingkylli, u Bah Prestone ula ong ba ka jaka sdang jong kane ka surok 4-lane jong ka NH-6 ka dei na Lad Umroi haduh ha Ratacherra bad ia kane ka project la khot kum ka ‘Economic Corridor”. Kane ka project ka dei kaba la shimkhia da ka Sorkar India.
Ula pyntip ba ka Tnad kala pyndep ia ka kaiphod ba biang ban pyntrei ia ka project (feasibility) bad mynta ka dang pynkhreh ia ka Detailed Project Report (DPR).
“Ka kam ban thied jaka kala sdang bad nga thikna ba kan sa dep noh kloi bad ka jingkhot tender ruh kan sa shong noh hi” ong u Bah Prestone.
I MLA ka NPP na Saipung-Sutnga Kong Santa Mary Shylla ila kyrpad ia ka Sorkar ban pynkloi noh ia ka jingshna ia ka surok 4-lane jong ka NH-6 namar kane ka surok ka dei kaba kongsan ia kiba bun ki Jylla ha ka thain Shatei Lam Mihngi.
Haba pynsngew ia kajuh ka sur, u MLA ka UDP na Mokaiaw Nujorki Sungoh ula ong ba ki paidbah kila sahkut da ki 6-7 ngut ha ka jingdheng kali ha NH-6 bad kyrpad ia ka Sorkar ban pynioh noh kham kloi ia ka mang tyngka jong kane ka surok.
Ula kyrpad ruh ban maramot noh mardor ia ka surok Jowai By-Pass kaba la jot rathai mynta.
Halor kane, u Symbud Myntri Rangbah ula pyntip ba ka Tnad kala dep ai ia ka work order bad T. 11 klur haduh T. 12 klur la mang bad la dep bthah ruh ia u contractor ban sdang noh mardor ia ka jing maramot ia ka surok Jowai-By-pass.
