Shillong, Lber 22: Kum shi bynta jong ka jingpynkhreh ban pynlong ia ka Shad Suk Mynsiem, hynne ka sngi ka Seng Khasi, Kmie, Mawkhar Shillong, kala pyndep ia ka nguh ka dem ka khnong ka bishar naka bynta ka Kiew Ksing bad ia kane la pynlong ha ka ïingseng kaba don ha Mawkhar.
Ia ka jingialang la pyniaid ia da u Rgh Rangpher Rynjah dkhot JPK, la ioh ia ka jingkren maitphang na u Rgh O. Pyngrope Vice President ka Seng Khasi Kmie bad na ka liang jong ka kynhun u Tymmen U San Seng Khasi Kmie hapoh ka jingialam u Vice Chairman u Rgh Donbokstar Kurkalang, u la pyndep ia ka nguh ka dem ka khnong ka bishar da ka lengbah ka lengsan, u khaw eh u khaw khien, ban khmih ia kita ki dak ki shin ban ia pan na U Blei Trai Kynrad ba naduh ka sngi ba la pynkhreh, ba ki kam ki jam kin da iaid beit kin da iaid ryntih, bad ba ka shad ka kmen kan da phuh kan phieng, u duhalia un da ioh ia ka buit ka bor ba un lah ha kaban tem ban put bad ka sur jong ka ksing, ka tangmuri ka kynshaw kin da sawa da ka sur ba bang ba thiang, kaban pynshoh ia ka met ka phad ia ki rang bad ki thei sotti haba ki mih ban iuh kjat ban shad ha lympung.
Hadien ka nguh ka dem ka peit dak ka peit shin bad haba la biang lut nadong shadong, ki Duhalia ki la sdang ban tem ia ka ksing lumpaid bad bynrap lang da ka jingtem sa ia kiwei pat ki skit kiba don baroh 7 tylli.
Naduh kane ka sngi ba la pynkiew ia ka ksing, man la ka janmiet, kan don ka jingtem ia ka ksing bad ruh ban hikai shad ia ki khynnah, ki samla kynthei bad shynrang, ha Seng Khasi Hall, kaban iai bteng haduh ka janmiet jong ka 7 tarik U Iaiong kaba long shi sngi shwa jong ka Shad Nohkjat kaban long haka 8 tarik.
Pule lang ia kane: Pyntip u CM ban sdang lashem bnai ka jingiakren pynbeit pud jong ka kylla kaba-ar
Kum ban shu kdew ka kiew ksing, kadei ka byrta ka shula ne ka jingpynbna iar sha ki parakur parakha ka Bri Hynñiewtrep Hynñiew Skum, ba ka por ka samoi ban pynlong iaka shad ban ai nguh ai dem ia U Blei Trai Kynrad kala poi, naka bynta ban khreh ban sei ia ki riam ka beit ka ksiar ka rupa naka bynta ban ioh ha kaban pynriam ia la ki nongshad kynthei bad shynrang, khnang ba kin ioh ban ia mih lympung bad ban shad hun bad palei ka mynsiem.
