Mairang, Lber 22: Ka ophis jong I District Sports Officer ka West Khasi Hills District, Nongstoiñ, kan pynlong ïa ka Chief Minister’s Under-12 years Block and District Level Open Football Tournament 2023 na ka bynta ki khynnah ïalehkai ka Eastern West Khasi Hills District kiba hapoh 12 snem ka rta.
Kane ka lympung ialehkai kan sdang naduh ka 10 tarik u Ïaiong 2023 ter ter ïa ka ban bud sa ka District Level Tournament bad ka State Level Tournament ïa kiba la buh ban pynlong ha u bnai Jymmang bad bnai Jylliew mynta u snem.
Ïa ka jingpynshisha ïa ka rta jong ki khynnah ïalehkai na Mairang Block yn pynlong ha Tirtot Sing Memorial Hall, Pyndengumiong, Mairang bad na ka bynta ki khynnah ïalehkai na ka Mawthadraishan Block, yn pynlong ha Madan Domsohphlang, Markasa naduh ka por 10 baje mynstep jong ka 5 tarik u Ïaiong 2023.
Ki khynnah ïalehkai kim dei ban long kito ïa kiba la kha hashwa ka 1 tarik u Jylliew 2012 lane hadien ka 30 tarik u Jylliew 2014. La bthah ruh ïa ki khynnah ïalehkai ba kin rah bad ïa la ki Birth Certificate ha ka sngi ba la buh ban bishar pynshisha ïa ka rta jong ki, kata ha ka 5 tarik u Ïaiong 2023.
Na ka bynta ki jingtip kiba kham bniah halor kane ka bynta, lah ban ïoh da kaba phone sha ka ophis I District Sports Officer West Khasi Hills District Nongstoiñ ha ka por long trei lyngba ki nombar phone 94023-00795 bad 80142-51242. Ïa ki entry form lah ruh ban ïoh na ki ophis jong ki BDO ka Mairang bad Mawthadraishan Block ha ki por long trei. Ka tarik ba khatduh ban pynpoi ïa ki kot ki sla ba donkam sha ki ophis jong ki BDO kan long ha ka 31 tarik u Lber 2023.
