Nongstoiñ, Lber 22: U Superintendent of Fisheries ka West Khasi Hills Bah ER Laloo hynne ka sngi ula plie paidbah ia ka Fish Kiosks bad Fish Sanctuary ha ka shnong Laitkseh kaba hap hapoh ka Mawthadraishan C&RD Block, ha ryngkat ka jingïadonlang jong ki nongïoh jingmyntoi, u Sordar ka shnong Laitkseh, ki officers bad ki nongtrei jong ka Fisheries Department.
Ha kane kajuh ka sngi la plie ruh ïa ka Fish Sanctuary kaba ka jingheh ka long 200mts kaba don ha ka wah Umnamlang ha ka shnong Laitkseh. Kane ka Fish Sanctuary la peit bad pynïaid da ka Laitkseh Area Fish Farmers Association. Ka project jong kane ka scheme ka long Rs 5,00,000.00 (San Lak) ha kaba 100% la bei da ka Sorkar
Haba ai jingkren lyngkot ha kane ka sngi plie, u bah ER Laloo SF u la ïathuh ba ki fish kiosks ka dei ka ba la bei pisa da ka Sorkar Kmie, ïa kaba la tip kum ka scheme PMMSY 2021-22, ka project kaba long 10 lak tyngka, ha kaba 60% la ai da ka Sorkar bad 40% pat na ka jinglah la jong.
U la ong ruh ba ka jingthmu ban shna ïa ki fish sanctuary ne ki jaka ri dohkha, ka long ban pynneh pynsah ïa ki dohkha kiba ïoh na la ka jong ka Jylla bad ban kyntiew ruh ïa ka kamai kajih. U la ai khublei kyrpang ïa baroh kiba la ïa don bynta, ïa ka association kiba la wan shakhmat ban shim ïa kane ka sien jam jong ka scheme bad ban pyndep ruh ïa kane ka project ha ka por ba la buh, da kaba kyrmen ba ki lah ban pynïaid iew bha ïa ki dohkha ba ki ri.
Pule lang ia kane: Pynkup burom ka President da ka khusnam Padmashree ia u Rang Khasi
