Shillong, Lber 21 : U Myntri Rangbah ka Jylla Conrad K Sangma hynne ka sngi ba-ar, ula iai ban ba ka shnong Mukroh ka dang hap hapoh u pud u sam ka Meghalaya haba bynrap ba ka sorkar kala kut jingmut ban pynbeit noh ia ka jingiakajia ha ki hynriew tylli ki jaka ba dang sah, bad ka sorkar Assam.
Haba jubab ia ka jingkylli bynrap bala wanrah da u MLA ka VPP na North Shillong Bah Adelbert Nongrum, u Conrad ula ong ba kat kum ka census code, ka Mukroh ka dang hap hapoh u pud u sam jong ka West Jaintia Hills District.
Kane ka jingkren jong u kala mih ruh tang da ki sngi hadien ba u Myntri Rangbah ka Assam Himanta Biswa Sawma ula pyntip ha Iingdorbar Thaw Ain ka Assam ba ka Mukroh ka dang hap ha Assam.
Ula ong ba ka sorkar kala buh ruh ia ka polling station ha Mukroh ha ka elekshon MLA ba dang sh dep nalor ka jingbuh ia ka Fair Price Shop, ka Lower Primary School, Health Sub Centre bad kiwei kiwei.
U Myntri Rangbah u pyntip ba ha ka 17 tarik Lber, palat 502 tylli ki job card la dep ban sam ha Mukroh na ka bynta ka jingmyntoi ki nongshongshnong.
“(Namar kata) ngi ieng ha ka nongrim kaba shai ba ka Mukroh ka dang hap ha Meghalaya” ula ong.
La ka sorkar kala ujor ejehar halor ka jingshah siat iap ki 5 ngut ki mynsiem ba lui lui ha ki Pulit Assam myn ha u Naiwieng 2022, u Myntri Rangbah ula ong ba ia kane ka case la register hapoh ka Nartiang Police Station.
Hynrei ula ong ba kane ka kam ka long subjudice namar ka jingtohkit jong ka Inquiry Commission ka dang iaid shakhmat.
Haba u MLA ka UDP na Mookaiaw Nujorki Sungoh ula pynpaw ia ka jingkwah ban tip ia ka sienjam bala shim halor ka jingdawa weng noh mardor ia ka Forest check gate ka Assam ha Mukroh, u Myntri Rangbah ula ong “Ngim shym la lah ban leh eiei ia kane ka kam namar ka jingpynkynriah ia ka khyrdop ka hap hapoh ka kyndon tohkit jong ka Inquiry Commission. Ka jingtohkit mynta ka dang iaid shakhmat. Namar kata, ai b aka jingtohkit kan dep shuwa”.
Shuwa kane, u Nongialam ka NPP bad MLA ka Nongkrem Bah Ardent M Basaiawmoit ula pynpaw ia ka jingsngewkhia halor ka jingshngain bad jingiada jong ki briew ba sah ha ki shnong khappud bad ong ba ki paidbah ki im hapdeng ka jingsyier bad pynpyrkhat ba hato ka lah ban dei na ka jingjem palat jong ka Sorkar Jylla kaba la pynshlur ia ka Assam wat ban kam trai ia ka Mukroh.
Haba jubab ia kane, u Myntri Rangbah ula ong ba ha kine ki 50 snem, la sakhi ba ki don ki jingjia kiba jia ha ki jaka khappud bad kane hi ka mih na ka jingiakajia pud bad ka jingbym pat lah ban iapynbeit ia u pud u sam.
Kat kum ka jingong jong u, dei namar kane, baroh arliang mamla kila kam trai ia ki jaka bad lam sha ki jingjia bapher bapher.
“Ta ka daw ka sorkar MDA-I kala angnud ban pynbeit noh ia ka jingiakajia pud..ta ka daw ngi la ieng skhem bad soi ia ka MoU. Namar kata, ngi la iatrei mynta ban nang iajam shakhmat ha kaban lah pynbeit noh ia ka jingiakajia sa ha ki hynriew tylli ki jaka ba dang sah” ong u Conrad.
Haba u Bah Ardent ula dawa ia ka jingkular ba ka Sorkar kam dei ban iapein ia ka jingshngain bad ka jingiada iaki briew ban kiar noh na kawei pat ka jingjia ther kuli, u Myntri Rangbah ula ong ba ka long kaba donkam ban pynkhlain ia ki bor Pulit ka Jylla ban pynsngew shngain ia ki paidbah.
“Namar katam ngi la jam shakhmat ban pynkha ia ki border outpost, pynkhlain iaki briew” ong u Conrad haba ban jur ia ka jingdonkam ban iakren bad iatreilang bad ka Assam ban lah pynneh ia ka shongsuk shongsain ha ki jaka khappud.
Nalor kane, u Myntri Rangbah ula pntip ba ha ki jaka khappud jong ki Jylla, ka Sorkar kala pynkha haduh 7 tylli ki border outpost. Nalor ki Police Station bad Outpost bala don lypa, kila don ruh ki Police Station ba tymmai bad ki Police Outpost kiba la pynieng shajan jong ki jaka khappud bad ka Assam.
U pyntip ba ka Sorkar kala dep thaw biang ia ki Regional Committee bala khlieh da ki Myntri Sorkar ban iapynbeit ia ki hynriew tylli ki jaka bym pat dep iapynbeit bad ka Assam.
Pule lang ia kane: Kylla khongpong ka bos Night Super ha Ri-Bhoi, mynsaw bun ngut ki briew
