Shillong, Lber 17 : Ka Sorkar Jylla kan wad ia ki lad ki lynti ban pynthikna ba ka Meghalaya Energy Corporation Limited (MeECL) kan long ka Tnad ba iohnong bad ai ka jingshakri ba bha ia ki paidbah ka Jylla, ong u Myntri ka Tnad bording, Abu Taher Mondal.
Haba iakren bad ki nongthoh khubor ha ka janmiet sngi palei, u Mondal ula ong ba ka Sorkar kan sa pule bniah ia ki jing ai jingmut jong ki committee bapher bapher ba kumno yn lah ban pynjanai ia ka jingtreikam baroh jong ka MeECL.
“Lada long kaba donkam, ngin pynkhamti ha kiwei pat ki bor lane ki tnad Sorkar ban pynlong ia kane ka Corporation kaba treikam ha ka lynti kaba dei…Kan don ruh ka jingpynbor wat na u Myntri Rangbah ka Jylla ban pynjanai ia ka jingtreikam jong ka MeECL” ula ong.
U Myntri Bording ula pyntip ruh ia ka jingdonkam ban pynkylla ne saindur thymmai ia ka jingtreikam ka tnad bording hapoh ka Jylla.
Halor ki jingeh jong ki Nongtrei ka MeECL, u Myntri ula ong ba ka Tnad ha ka jingshisha ka lah dei ban kamai na ka jingiakhaii bording bad ban siew tulop sha ki Nongtrei.
“Ia mynta hi ngim nang ong eiei eiei. Ngin hap ban wad ia ki lynti ha kaban pynduna shuwa ia ki jingduhnong. Kane kan iarap ia ka Corporation ban shakri bha ia ki Nongtrei ha ka lynti kaba dei. KIba bun kim shym la ioh ia ka bai bam tynmen” ong u Mondal.
Ula ong ruh ba ka MeECL kala shah ktah jur eh namar ka daw ka jingiateh soskular bad ka NTPC.
“Ngin kham biang bha lada ngi lah ban pynbeit noh ia ki jingeh ba iatakhuh bad ka NTPC” ula ong.
