Guwahati, Lber 14: Hadien ba u Himanta Biswa Sarma u la shimti kum u Myntri Rangbah (CM) ka Assam ha u bnai Jymmang 2021, ki la don haduh hynriewphew hynriew ngut kiba shah kynnoh kam bymman kiba la shah pyniap bad 158 ngut kiwei pat ki la ngat ha ki jingmynsaw hapoh ka jingpeit jong ki pulit (custody), pynsngew ka dorbar Assembly ha ka sngi Nyngkong ba la dep.
Haba jubab lyngba ka jingthoh ia ka jingkylli ba la wanrah da u MLA ka AIUDF u Ashraful Hussain, u Sarma u la ong ba ki don 35 ngut ki briew ba shah kynnoh kam bymman kiba la shah pyniap bad 12 ngut kiwei pat ki la mynsaw na ki jingjia iather kuli bad ki pulit hapdeng ka 10 tarik u Jymmang 2021 haduh 28 tarik Rymphang 2023.Saw kumba 26 ngut kiwei pat ki8 la shah pyniap bad 146 ngut ki la shah pynmynsaw na ka jingther kuli ki pulit, ong shuh shuh u Sarma.
“Nalor kine, san ngut kiba shah kynnoh kam bymman ki la shah siat iap ha ka jingbakla katba ki dang pyrshang ban phet na kti jong ki pulit,” ong u Sarma uba bat ruh ia ka tnat kam pohiing.
Ha ka por jong ka jingiatai nia halor ka Motion jong ka jingai khublei halor ka jingkren jong u Lat, u MLA ka AIUDF u Aminul Islam u la kylli halor ka jingbym lah treikam jong ki pulit ha kaba khah khah ki briew kiba la shah kynnoh donkti kam bymman bad kiba pyrshang ban phet ki ju shah siat iap.
“Ka sorkar ka la leh ia ki kam pyniap dusmon (fake encounters).Ka jingjia ia u Kenaram Basumatary bad u Kirti Kamal Bora ka pynshisha ba kane ka kam pyniap dusmon ka dang iai bteng ha Assam.U Lat u dei ban tip ia kane,” u la ong shuh shuh.
Ka jingtohkit da ka tnat CID halor ka jingshah pyniap jong uwei u briew ia uba la suba ba u dei u runar na ka jingther kuli ki pulit ha ka 24 tarik u Rymphang ba la dep ha Udalguri district ka Assam la shem ba kadei ka jingithuh bakla.
Ha ka jingtohkit bniah la pynkut ba utei uba shah pyniap um dei satia u runar u Kenaram Boro ia uba la tip bha kum u Kenaram Basumatary hynrei u dei u Dimbeswar Muchahary uba kiba haiing hasem jong u ki la ong u dei tang u nongrep hynrei ia kaba ki pulit ki la kam ba u dei u runar ba shyrkhei.
