Shillong, Lber 07 : Ka Sorkar Meghalaya Democratic Alliance (MDA)-2 ba ialam da ka NPP, kala jied ia u MLA ka North Tura bad Nongaibuit barim u Myntri Rangbah Thomas A Sangma kum u kyrtong iamonlang ban iakhun ia ka elekshon sha ka shuki Lamphang ka Iingdorbar Thaw Ain ka Jylla.
U Thomas A Sangma ula thep ia ka kyrteng kum u kyrtong hynne ka sngi ba-ar hakhmat u Commissioner Secretary ka Meghalaya Legislative Assembly Andrew Simon ha Assembly Secretariat bad la synran ia u da ki MLA ka NPP.
Ka Elekshon sha ka shuki Lamphang ka Iingdorbar kan long ha ka 9 tarik u Lber.
Haba sam ia ka khubor ha ki rynsan social media, u Myntri Rangbah ka Jylla Conrad K Sangma ula ong “Nga kitbok ia kaba bha tam ia u Thomas A Sangma, kyrtong Lamphang ka Iingdorbar Thaw Ain ka Jylla”.
Haba iakren bad ki nongthoh khubor hadien ba thep kyrteng, u Thomas ula iaroh ia ka Sorkar MDA-2 ba ialam da u Myntri Rangbah Conrad K Sangma, uba la ai ka jingngeit bad jingshaniah ha u. Ula ong ruh ba ka Sorkar MDA barim kala ai ha u ia shibun ki kabu ban trei ha ryngkat bad ki paidbah.
Da kane ka jingkyrshan jong baroh 45 ngut ki MLA, u Thomas Sangma ula thikna ban shimti ia ka shuki Lamphang ka Iingdorbar Thaw Ain kaba bat mynshuwa da u President ka UDP bad MLA ka Mairang Bah Metbah Lyngdoh.
