Kohima, Lber 07 :U nongialam ka Nationalist Democratic Progressive Party (NDPP) u Neiphiu Rio u la shim smai kum u Myntri Rangbah (CM) ka Nagaland ha ka kylla kaba sansien kynthih hadien ka jingjop kaba donburom.
Na ka liang u Myntri Rangbahduh (PM) Narendra Modi u la ia don lang ha kane ka jingpyntian smai ha ryngkat u CM ka Assam u Himanta Biswa Sarma.
U Rio ha ka sngi Saitjain ba la lah u la phah ia ka shithi iehnoh kam kum u CM ka Nagaland sha u Lat ka jylla u La Ganesan bad kam na ka bynta ban thaw ia ka sorkar kaba thymmai ha ka jylla.
Ka kynhun synrop NDPP-BJP ki la ioh ia ka jingbun paid hadien ka ilekshon assembly kaba dang shu kut shen ha Nagaland, ha kaba ka NDPP ka la jop haduh 25 seat bad ka BJP 12 seat.
Lah ban kdew ba kane ka jingthaw sorkar ka dei ka sien kaba ar na ka bynta ka kynhun synrop NDPP-BJP ha Nagaland.
Kiwei pat ki nongialam ka NDPP kiba la shim smai ki kynthup ia u TR Zeliang kum u Symbud Myntri Rangbah (Dy.CM), Kaito Aye, K G Kenye, Mestubou Jamir, CL Jhon, bad u Salhoutuonuo Krusa.
Ha kawei pat ka bynta, kiwei pat ki nongialam kum u Y Patton, Jacob Zhimomi, Temjen Imna Along, Paiwang Konyak bad u Bashangmongba Chang ruh ki la shiim smai ha katei ka jingialang.
