Shillong, Lber 07: U National Vice President ka BJP u M Chuba Ao uba khmih ruh ia ka jylla Meghalaya, hynne ka sngi ula kubur ba ki jingkynnoh pyrshah ia ka seng NPP bad ka jingkynnoh ba ka jylla Meghalaya ka dei kawei na ki jylla kaba jur ha ki kam bamsap, ki dei tang ki jingkynnoh ban khroh vote ha ka por elekshon ha Meghalaya.
U Chuba Ao ula kren ia katei, haba jubab iaka jingkylli halor ka jingkynthoh jong u Myntri Kam Pohiing ka ri u Amit Shah ha ka por ialap elekshon ba ka jylla Meghalaya kadei ka ba bamsap tam.
“Ha ka por elekshon ki ju don ka jingiakawang ktieh hapdeng ki party kumba ki kynnoh ia ka BJP kum ka party Hindu. Ka jingkynnoh ka dei tang ban khroh ia ki vote ha ka por elekshon.” ong u Chuba Ao haba iakren bad ki nongthoh khubor hadien ba la wai ka jingialang pynbam smai ia u Myntri Rangbah ka jylla Conrad K Sangma ryngkat bad ka kynhun myntri ka jong u ha Raj bhavan.
Une u nongialam ka BJP ula ong, ka BJP kala pynkhreh bha ha ka por elekshon hynrei ki paidbah ki la pynjop tang 2 ngut na ka seng BJP bad ka BJP kam lah ban leh bha eiei, hynrei u kyrmen skhem ba ha ki snem ban wan, ka party kan lah ban trei shitom bha.
“Ngi hap ban hun ia ka rai ban ioh Myntri tang uwei namar ba hap ban burom ia kiwei ki paralok kiba don lang ha ka sorkar MDA” ong u Ao.
Ha kaba iadei bad ki jingkynnoh bamsap ia ka sorkar barim, u Ao ula ong, ia mynta ym pat kwah ban kren eiei halor ki kam bamsap hynrei yn iakren shwa tang shaphang ka jingthaw sorkar bad ka jingkynnoh bamsap ia ka sorkar MDA-1 ruh ym pat lah ban ai jubab namar ba ym pat don ki sakhi sabut.
Ha kaba iadei bad ka jingbhah ia ka shuki Myntri hapdeng ki arngut ki MLA ka BJP hapdeng u Bah AL Hek bad Bah Sanbor Shullai, u Chuba Ao ula ong, kane kadei ka rai jong ki nongialam ka BJP seng kmie.
Lah ban kdew hangne ba ka BJP ha ka shithi ai jingkyrshan sha ka NPP ban thaw Sorkar, kala pyntip ba ka party kala buh kyndon da ka jingthoh ba ia ka shuki Myntri dei ban ia bujli mar arsnem shiteng hapdeng u Bah A.L.Hek bad u Bah Sanbor Shullai.
Kala pyntip ba u Bah A.L.Hek un shimti shuwa nyngkong ia ka shuki Myntri ka ban neh arsnem shiteng haduh ka 7 tarik Nailar 2025 bad sa shimti pat da u Bah Sanbor haduh ba kut ka samoi.
Ka BJP kala buh kyndon ruh ia ka NPP ba ka jingkyrshan kan long halor ka nongrim ba ka Sorkar ka dei ban treikam haba khuid haba shai bad ka jingshakri bha ia ka Jylla.
