Shillong, Lber 06: Ka seng Hynniewtrep Youth Council (HYC) hynne ka sngi kala dawa na baroh ki sengsain pyrthei kiba don hapoh ka sorkar synroplang Meghalaya Democratic Alliance (MDA 2.0) ba kidei ban pynthikna ban pynurlong ia baroh ki mat ilekshon kiba kila bsuh hapoh ki Manifesto.
Haba kren sha ki lad pathai khubor u president ka HYC u bah Robertjune Kharjahrin ula ong ba ka jingthang tynshop jong ki 2 ngut ki MLA kiba la jop naka seng Hill State People’s Democratic Party (HSPDP) kadei namar ba ki paidbah kila bitar iaka jingleit kyrshan jong ki iaka sorkar ban ialam daka National People’s Party (NPP).
U bah Robert ula ong ba ka seng ka pyrshah ia kano kano ka Party ban thaw sorkar hynrei ka kwah ba u myntri rangbah un dei napoh Khasi-Jaintia Hils namar la palat 10 snem tam ka Meghalaya kam pat ioh myntri rangbah napoh ka rilum Khasi-Jaintia Hills.
Ula ong ba mynta ka kynti, ki paidbah ka jylla kim lah shuh ban shu shah pynbeij shi sien san snem bad dei namar kane ka seng kan buddien ia baroh ki mat ilekshon ba baroh ki Party kiba don lang hapoh ka sorkar MDA 2.0 ban pynthikna ba kin urlong naka bynta ka bha ka miat ki paidbah bad ka jylla Meghalaya baroh kawei.
“Baroh ki party kiba don lang hapoh ka sorkar MDA 2.0 naduh ka NPP, UDP, HSPDP, PDF bad BJP kidei ban pynurlong lut ia baroh ki mat ba kila bsuh ha baroh ki Manifesto bad lada kine ki Party ne ka sorkar kam lah ban pynurlong, naka liang ka seng ka pynjur ka jingiakhih ha baroh kawei ka jylla” la ong u bah Robert.
U bah Robert ula ong ba ka UDP bad ka NPP kila kular lyngba ka Manifesto ban pynurlong iaka jingdawa pyntreikam Inner Line Permit (ILP) ha Meghalaya bad naka liang ka UDP kala kular ruh ban bishar biang iaka memorandum of understanding (MoU) hynrei naka liang ka NPP pat kala kren shai ba kam ban phaikhmat biang ka MoU.
“Mynta ka UDP kala iatreilang biang bad ka NPP bad ka jingkylli ka mih, hato ka UDP kan lah ne em ban pynkohnguh iaka sorkar ba ialam daka NPP ban bishar biang iaka MoU halor ka jingpynbeit pud bad ka jylla Assam” la ong u bah Robert.
U bah Robert ula ong ba haba iadei bad ka bha thungkam lane ka ‘State Reservation Policy’ naka liang ka NPP kam kwah ban iakren hynrei naka liang ka UDP hapoh ka Manifesto kala kular ban biashar biang iaka Reservation Policy bad kumjuh ruh ban pynduh noh iaka Interview naka bynta ki kam barit bad ka jingkylli ka mih mynta ka long, “hato ka UDP kan lah ne em ban pynkohnguh iaka sorkar ba ialam da ka NPP ban bishar biang ka State Reservation Policy”.
Ula bynrap ba naka u myntri ka tnat kam pohïng ka sorkar pdeng u Amit Shah hashuwa ka ilekshon ula kynnoh ba ka Meghalaya kadei ka jylla ba bamsap tam hapoh India, kala kular ruh ban thaw daka enquiry committee halor ki kam bamsap hynrei mynta ka BJP kala iatreilang biang bad ka NPP.
“Nalor shibun ki jingkular ka BJP kala kular ruh ban pynbeit noh ia u pud u sam, ban tohkit iaki kam bamsap, ban thaw haduh 5 lak ki kam, ban iarap mar T. 1000 iaki samla ba khlem kam haba iadei bad kane ka seng ruh kan sa buddien ba kine kiei kiei ba ka BJP kdei ban urlong ha kine ki 5 snem” la ong u bah Robert.
“Hadien ka jingthaw bad bam smai ki myntri ka sorkar synroplang ka MDA 2.0, naka liang ka seng kan leit kynduh iaka sorkar ban pynkynmaw halor kine ki jingkular ba kila bsuh ha man la ki Manifesto bad lada ka sorkar MDA 2.0 kam lah ban kular ia kiei kiba kila kular hashuwa ka ilekshon, naka liang ka seng kan pynlong ki jingiakhih ha baroh kawei ka jylla” ula bynrap.
