Shillong, Lber 01: Ka executive committee (EC) jong ka Khasi Hills Autonomous District Council (KHADC) hynne ka sngi kala phah iaka kyrteng jong u bah Ainam Manik Syiem ban thung kum u Syiem ba pura jong ka Hima Mylliem.
Ia kane ka rai la shim hadien ba u bah Ainam Manik Syiem ula shah jied kum u Syiem ba pura ka Hima Mylliem haka jingiajied Syiem pura bala long haka 20 tarikm Rymphang 2023 hapoh ka Conference Hall jong ka KHADC.
Ha kane ka jingiajied Syiem pura, ki la don 41 ngut kiba jied Syiem bad 31 ngut kila wan shim bynta bad iaka Resol ruh la pynbna ha ka juh ka sngi da u Returning Officer (RO).
Haba rah iaka kaiphod jong ka ilekshon, u EM badei khmih iaka Elaka u bah Jambor War ula ong ba ka EC katkum ka Section 5 of the KHAD (Appointment and Succession of Syiem, Deputy Syiem, Electors and Rangbah Shnong of Mylliem Syiemship) Act, 2007 kala mynjur ban thung ia u bah Ainam Manik Syiem u bala shah jied kum u Syiem ba pura ka Hima Mylliem.
U bah Jambor ula ong ba ia kane ka ilekshon ban jied Syiem thymmai la leh hadien ba ka jingieh noh kam jong u Syiem ka Hima Mylliem u bah Latho Manik Syiem namar ba ula shah Sospon bad kumjuh ruh namar ba um don iaka met kaba koit ba khiah ha kaba ka EC kala mynjur iaka Notification bala pynmih haka 29 tarik Naiwieng 2022.
Kum ban shu pynkynmaw ba haka por ba u Syiem ka Hima Mylliem u bah Latho Manik Syiem u dang don haka jingshah Sospon, iaki kam ki jam jong ka Hima la pyniaid hi da u bah Ainam Manik Syiem kum u Acting Syiem ka Hima Mylliem.
Haba iadei bad ka jinglait kam hapoh ka Hima Mylliem, naka liang ka KHADC kala pynmih iaka jingpyntip haka 11 tarik Kyllalyngkot bad naka liang u Returning Officer (RO) ula pynbna iaka jingthep kyrteng haka ba 8 ngut kila wan naka bynta ban iakhun iaka ilekshon ban long u Syiem ba pura ka Hima Mylliem.
Ha kane ka jingiajied ilekshon, ki 5 ngut kiba wan iakhun ilekshon ki kynthup u bah Samran Sing Syiem, Pynshailang Syiem, Banteilang Syiem, Ainam Manik Syiem bad u Mansan Manik Syiem.
