Shillong, Lber 01 : U Nongialam ka UDP bad Chief Executive Member (CEM) ka KHADC Bah Titostarwell Chyne, hynne ka sngi Balang ula pynpaw ia ka jingsngewskhem ba ka UDP kan jot hapdeng 15-20 seat ha kane ka elekshon MLA, ka ban niew vote lashai ka 2 tarik Lber.
“Ngi la sngewskhem ba ka UDP kan ioh bun ngut ki MLA ha kane ka kynti. Ngi la khmih lynti ban ioh hapdeng 15-20 ngut lane palat ia kata” ong u Bah Titos haba iakren bad ki nongthoh khubor.
Ula ong ba ka UDP kala shong jingialang hynnin ka sngi bad baroh na ki kyrtong ba iakhun kynthup kito kiba na Ri-lum Garo kila pynpaw ia ka jingsngewskhem ban jop na ki constituency ba ki mih iakhun.
Ka jingiathep vote ha ki 59 tylli ki constituency napdeng ki 60 tylli, kala long ha ka 27 tarik Rymphang bad ka jingianiew ia ki vote kan long lashai ka 2 tarik Lber.
Haba kylli, une u Nongialam ka UDP ula ong ba kaei kaba long ba man mynta kan batai la ka party kan dei ka king maker lane kan ialam ia ka sorkar ba thymmai.
“Baroh kan shong ha ka jinglong jingman bad ka jingioh nombor” ula ong haba bynrap ba u kwah ban kiar na ka jingkam pynheh. Ula ong “Hadien ba ngi ioh ia u nombor, ngin sa sngewthuh ia kaei kaba donkam ban leh”.
U Bah Titos ula kyntait ba ka UDP ka don ia ka jingsngewthuh jingmut bad kino kino ki seng sain pyrthei ha kaban thaw ia ka Sorkar ba thymmai.
“Ngim pat don satia kano kano ka jingiasngewthuh jingmut bad ki seng sain pyrthei. Namar kata, ngim lah ban ong bad no ngin iatreilang hadien ka elekshon hynrei ngi kwah ban iatrei bad ki seng sain pyrthei kiba iasngewthuh jingmut bad ba don ia kijuh ki nongrim treikam” ula ong haba bynrap “Hynrei kane kan shong ha ka rai jong ka Parliamentary Party bad ka Party hi baroh kawei”.
U Bah Titos ula ong ba shimet hi, u sngew ba ka party ka donkam ban iatreulang bad kiwei ki sen gsain pyrthei kiba lah ban ai ia ka sorkar kaba skhem bad ba lah ban wanrah ia ki jingkylla hapoh ka Jylla.
Une u CEM ka KHADC u dei uwei napdeng ki 19 ngut ki MLA jong ka KHADC uba iakhun ia ka elekshon MLA 2023. “Ngi don haduh 19 ngut ki MDC ba iakhun ia ka elekshon bad nga kitbok ia baroh ba kin jop na ki constituency ba ki iakhun” ula ong.
Haba pynpaw ia ka jingsngewskhem ban shah jied biang na Sohra constituency, u Bah Titos ula ong “Haba phi iakhun elekshon, phin don beit ia ka jingsngewskhem ba phin jop hynrei ka shong pat ha ka rai jong ki paidbah namar ngim lah ban ong eiei naba ym don ba tip iano ki paidbah ki vote. Nga sngewskhem ban jop namar ki paidbah ki la kwah palat ia ka jingkylla”.
Halor ka jingkynnoh bamsap pyrshah ia ka sorkar MDA, u Bah Titos ula ong ba u don ka jingsngew ba ka sorkar thymmai ka dei ban tohkit ia kum kine ki jingkynnoh bad ban wad ia ka jingshisha.
“Ym dei ban map iano iano ruh lada lap ba ki donkti ha ki kam bamsap” ula ong.
