Guwahati, Rymphang 27 :Ki nongialam bad ki nongkyrshan jong ka Seng Aam Aadmi Party (AAP) mynta ka sngi 27 tarik ki la pynlong ka jingiakhih ban pynpaw pyrshah halor ka jingshah kem jong u Symbud Myntri Rangbah (Dy.CM) ka Delhi u Manish Sisodia hakhmat ka headquarter jong ka seng BJP ha Basistha, Guwahati.
U Sisodia u la shah kem noh ha ka Central Bureau of Investigation (CBI) halor ka jingkynnoh donkti ha kaba iadei bad ka kam bam sap lyngba ka jingpynkhein ia ki polisi khang die kyiad ha 26 tarik mynta u bnai.
Haba pynlong ia ka jingiakhih, na ka liang ki nongialam bad nongkyrshan jong ka AAP ki la pyrta ruh da kaba ong “Sorkar BJP khie leitphai noh” bad dawa ruh ban pyllait noh mardor ia u Sidodia.Ki la don ruh katto katne kiba la shah kem noh ha ki bor pulit na katei ka jaka pynlong jingiakhih.
“La pyntip sha Nga ba kiba bun na ki ophisar ka CBI ki pyrshah ia kane ka jingkem ia u Manish.Kine baroh ki burom bha ia u bad kam don ruh kano kano ka sakhi pyrshah ia u.Hynrei, namar ka jingbanbor lyngba ki heh sain hima ban kem ia u, kumta ki la hap ban kohnguh iala ki kynrad,” ong u CM ka Delhi u Arvind Kejriwal uba la bynrap ruh ba ka CBI kam banse ban kem ia u.
Lah ban kdew ruh ba ha ka 26 tarik mynta u bnai, u MLA ka Sibsagar u Akhil Gogoi, uba dei ruh u President jong ka regional party Raijor Dal, u la pynrem jur halor ka jingshah kem noh u paralok jong u, u Sisodia ha ka CBI.
U Gogoi u la khot ia kane ka jingshah kem kum ka kam leh donbor bad u buh ka jingkyrpad ia ki nongialam liang pyrshah hapoh ka ri India baroh kawei ba kin pynlong da ka jingiakhih pyrshah ia kane ka kam leh donbor kaba long pyrshah ia ka synshar paidbah.
