Shillong, Rymphang 26 : Haduh 21.75 lak ngut ki nongthep vote ba kynthup ia 10.92 lak ngut ki Kynthei, kin ai rai lashai ka sngi ka 27 tarik Rymphang, ia ka lawei jong ki 369 ngut ki kyrtong kiba iakhun ban ioh long kum ki 59 ngut ki MLA ba thymmai sha ka Iingdorbar Thaw Ain ka Jylla.
Ka jingiathep vote kan sdang naduh ka por 7 baje mynstep bad kan kut ha ka por 4 baje janmiet ha baroh ki 3419 tylli ki Polling Station jong baroh 59 tylli ki constituency.
Tang ka Sohiong constituency, East Khasi Hills kan nym ioh pynlong ia ka jingthep vote namar ka jingkhlad kyndit jong u kyrtong ka United Democratic Party (UDP) Bah HDR Lyngdoh, ha ka 20 tarik Rymphang na ka jingsangeh treikam u klongsnam.
Haba iakren bad ki nongthoh khubor, u Chief Electoral Officer (CEO) Bah FR Kharkongor ula ong ba ki kynhun pyniaid elekshon bala synran da ki bor pahara, kila dep poi sha baroh 3419 tylli ki Polling station jong ki 59 tylli ki constituency.
Ula pyntip ba napdeng kine ki 369 ngut ki kyrtong, 36 ngut ki dei ki kynthei ki ban iakhun ha kane ka elekshon ka ban thep vote lashai ka sngi.
Ha ka elekshon MLA 2018, 329 ngut ki kyrtong kila mih ban iakhun ba kynthup ia 32 ngut ki kynthei.
Haba phai sha ki party, ka BJP kala pynieng kyrtong ha baroh 60 tylli ki constituency, ka AITC kala pynieng 56 ngut, ka NPP ba ialam da u Myntri Rangbah Conrad K Sangma kala pynieng 57 ngut ki kyrtong, ka UDP-46, HSPDP-11, PDF-9, GSP-1, GNC-2, Janata Dal (United)-3, Republican Party of India (RPI)-2, Republican Party of India (Athawale)-6, VPP-18.
Ki kyrtong kiba paw khmat bha ha kane ka elekshon ki kynthup ia u Symbud Myntri Rangbah bad Nongialam ka NPP Bah Prestone Tynsong (Pynursla), Lamphang ka Iingdorbar bad President ka UDP Bah Metbah Lyngdoh (Mairang), Myntri kam Pohiing bad Nongialam ka UDP Bah Lahkmen Rymbui (Amlarem) bad kiwei kiwei.
