Shillong, Rymphang 26: Ka Election Commission of India (ECI) hynne ka sngi U Blei kala ai da ka show cause notice sha ka All India Trinamool Congress (AITC) namar ka khubor social media ba pynkhein ia ka “Silence Period” ne ka Kynta ba jar jar ba 48 kynta hadien ba kut ka por ialap elekshon.
Kane ka notice ba la ai da u Chief Electoral Officer (CEO) Bah FR Kharkongor sha u President ka Meghalaya Pradesh Trinamool Congress ka ong ba ka Party kala pynkhein ia ka kyndon 126 (1) (b) jong ka Representation of People Act, 1951 da kaba buh ia ka appeal ban vote ia ka TMC ha ka Meghalaya Deserves Better Facebook page bad Instagram ha ka por 22:17 jong ka 25 tarik Rymphang lane por 10:17 baje mynmiet jong ka 25 tarik Rymphang.
Kane ka video ba la buh ka dei kaba la ai kyrteng “TMC is the only credible alternative”.
“Katba, ka kyndon 126 (2) jong ka Representation of People Act 1951 ka ong ba kino kino ki briew kiba pynkhein ia ka kyndon sub section (1) kin shah pynshitom da ka jingset along kaba lah ban poi haduh 2 snem lem lane ka kuna, lane baroh artylli. Namar kata, la ailad ia phi ban pynbeit noh kham kloi bad ban ai jingpynshai halor ka nongrim jong ka Party ban pynkhein ia kane ka kyndon” ong u CEO.
U CEO ula bthah ia ka AITC ba kan phah ia ki jingpynshai hapoh ka por 5 baje jong ka 26 tarik Rymphang.
Ka Election Commission lyngba ka jingpynbna ba pynmih ha ka 18 tarik Kyllalyngkot kala buh ba ka por ialap elekshon kala sdang naduh 7 baje mynstep haduh ka por 4 baje janmiet jong ka 2tarik Rymphang bad ka 45 kynta kan sdang naduh ka por 4 baje janmiet jong ka 25 tarik Rymphang.
Ka kyndon 126 (1)(6) jong ka Representation of Peoples Act, 1951 kala khang ban pyni sha ki paidbah ia kino kino ki kam ba iadei bad ka elekshon la ka dei lyngba ki cinema, TV lane kino kino kiba iasyriem ha ki Polling area hapdeng ka 48 kynta ba kut da ka kynta bala buh ban pynwai ia ka jingialap elekshon.
Nalor kane, ka kyndon sub Section (3) jong kajuh ka kyndon 126 ka batai ba ki kam elekshon ki mut ia kino kino ki kam kiba thmu ban khring ne ba ktah ia ka result jong ka elekshon.
