Shillong, Rymphang 24: Ka Election Commission hynne ka sngi thohdieng, kala pan jingpynshai na u kyrtong ka United Democratic Party (UDP) na Mawthadraishan constituency bah Brolding Nongsiej uba dei ruh u Myntri ka sorkar Meghalaya halor ka jingshah kynnoh pynkhein iaka Model Code of Conduct (MCC).
Lah ban kdew ba dang shen ka kynhun Sengbhalang ka la ujor sha u Returning Officer ha ryngkat bad ka jingkynnoh u bah Brolding Nongsiej ula sam pisa sha kawei ka longkmie lyngba ka skhim kaba hap hapoh ka prokram pynroi nongkyndong.
Haba iadei bad kane ka jingshah kynnoh, u Returning Officer (RO) ka Mawthadraishan Assembly constituency, West Khasi Hills ula bthah ïa u bah Brolding Nongsiej ban ai jubab hapoh ka 25 tarik u Rymphang, balei ym dei ban pynshitom ia u kat kum ki kyndon ba pynkhein ia ka MCC.
