New Delhi, Rymphang 23 : Ki pulit ka Assam mynta ka sngi 23 tarik ki la kem noh ia u nongialam ka seng Congress u Pawan Khera napoh ka kad liengsuin ha Delhi katba u dang thmu ban kiew ha ka liengsuin ban leit sha ka jingialang jong ka party ha Chhattisgarh.
Katkum ki khubor la ong ba une u nongialam ka congress u la shah kem noh halor ka jingkynnoh donkti ha kaba kren kynthoh pyrshah ia ka longiing jong u PM Modi.
Na ka liang u Prasanta Bhuyan, IGP Law and Order ka tnat pulit ka Assam haba kren sha ka lad pathai khubor u la ong ba ia ka case la registar pyrshah ia utei u nongialam ka congress hapoh Haflong police station ha Dima Hasao district ka Assam ha ka 22 tarik mynta u bnai.
“La ujor case pyrshah iau Khera hapoh Haflong police station.Halor ka nongrim kaba iadei bad kane ka case, ka kynhun ki pulit na Assam ki la wan poi ha Delhi na ka bynta ban wanlam ia u Khera sha Assam bad ban pynlong ka jingtohkit.U Khera u la shah pynngat ha ka case no 19/2023 hapoh ki Sections 153A/153(1)/500/504/505(1)(b) bad 505(2) bad 120B IPC, kaba kynthup ha kaba iadei bad ka jingsylla kam pyntriem bad ban pynmih ia ka jingsngew iapher niam.”
Katkum ki khubor, ia ka FIR la ujor pyrshah da uwei u briew ia uba la tip kyrteng kum u Samuel Changsan uba dei u EM jong ka North Cachar Hills Autonomous Council.
Ka kynhun ki pulit Assam ki la wan poi hapoh ka kad liengsuin ban kem noh ia utei u nongialam ka Congress halor ka jingkynnoh kren bein pyrshah ia u kpa jong u PM Modi.
Shibun bah ki dkhot jong ka party congress ki la pynlong ka jingiakhuh ha ka surok hapoh ka kad liengsuin (runway) hadien kane ka jingshah kem jong u Khera.U Khera la kynnoh ba u la shah pynsangeh ban kiew ha ka liengsuin khlem kano kano ka jingthoh ban kem ia u (arrest warrant).
