Shillong, Jylliew 28: U Myntri Rangbah ka Jylla Conrad Kongkal Sangma hynne ka step sngi ba-ar ula khot iakren ia ka Meghalaya Medical Services Association (MMSA) bad kular ban sa pynbeit noh kloi katba lah ia ki jingdawa ba ka synjuk kala buh hakhmat.
Kane ka jingkhot iakren kala urlong hadien ba ka MMSA kala pynbna ban iakhih da kaba sangeh treikam haduh 24 kynta myn sngi nyngkong, kum ka dak ka jingpyrshah ia ka jingbym leh eiei jong ka Sorkar pyrshah ia ki bor khmih ka Indian Institute of Public Health (IIPH), Shillong.
U President ka MMSA Dr YA Phira ula ong ba ka Synjuk ka iaroh ia ka jingsngewrit jong u Myntri Rangbah ka Jylla, ka jing sngewtynnad, jingsngewthuh bad ka jingiakren kaba sngewhun halor ka kam ba iadei bad ka jingiakhih bala khot da ka MMSA.
“Ngi kwah ban buh kynmaw ba ka Synjuk hadien ka jingioh pdiang ia ka khubor ha ka miet 27 tarik Jylliew ban iakren bad u Myntri Rangbah ka Jylla, kala shim mardor ia ka rai ban pynsangeh shuwa ia ka jingiakhih, kaba long ruh hadien ka jing ialang bad ka Secretary ba khmih ia ka Tnad ka Koit ka Khiah” ula ong.
“Ka Synjuk ka sngewskhem ba ia ki jingud jingnam baroh yn sa lah pynbeit noh kham kloi bad ba ka jingai jingshakri ia kiba pang ba shitom kan iai bteng khlem kano ka jingthut” bynrap u Dr Phira.
Lah ban kdew ba hynnin ka sngi nyngkong, u Myntri Rangbah ula kular ban sa khot mardor ia ka MMSA ban iakren sngew thuh halor ki mat jingdawa. “Ngan sa khot ia ki (MMSA) bad ngin sa pynbeit noh ia kane ka kam na ka bynta ka jingbha ha ka kam shakri paidbah” ong u Conrad haba iakren bad ki nongthoh khubor.
U Myntri Rangbah ula ong ruh ba ula ioh jingtip ia kane ka kam ka MMSA bad ula dep iakren ruh bad u Myntri ka Tnad ka Koit ka Khiah James PK Sangma.
Ka MMSA ha ka jingialang ba kyrkieh jong ka State Executive Committee ba long hynne ka 27 tarik, kala rai ban pynlong da ka jingsangeh treikam ba 24 kynta ka ban sdang naduh ka por 9 baje mynstep jong ka sngi ba-ar haduh ka por 9 baje mynstep jong ka sngi balang.
Ka MMSA kala shim ia kane ka rai namar ka jing mynthi jong ka sorkar ban pyntreikam ia ka mat jingdawa ha ka ban thung ia ka jingtohkit bad ban leh ia kaba donkam pyrshah ia u Registrar bad ka Director jong ka IIPH ba ki pynthohbria ia u Director ka Health Services (MI) Dr Aman War ha ki lad pathai khubor halor ka jingjia ba jia h ka 27 tarik Jymmang ha Campus barim ka NIFT, Pastuer Hills, Lawmali.
“Namar ka jingbym leh eiei jong ka Sorkar, ka SEC kaba shong jingialang hynne ka step, kala rai ban pyniaid shakhmat ia ka jingiakhih jong ka kylla ba nyngkong da kaba sangeh treikam ba 24 kynta naduh ka por 9 baje mynstep jong ka 28 tarik Jylliew haduh ka por 9 baje mynstep jong k 29 tarik Jylliew” ong u General Secretary ka MMSA Dr R Pohsnem ha ka shithi bala phah sha i Secretary ka Tnad ka Koit ka Khiah ka Jylla haba pyntip ia kane ka rai.
Ka MMSA kala pynpaw ruh ia ka jingkyndit halor ka rai jong u Principal Secretary ka Tnad ka Koit ka Khiah u Sampath Kumar ban ia shah sha ka IIPH kaba dei ka Institute shimet ha ka jaka ban sngap shwa ia u DHS (MI) u ban iathuh ia kaei kaba jia ha ka 27 tarik Jymmang ha Campus barim ka NIFT.
