Shillong, Jylliew 28 : U Kyrtong ba thmu ban aireng na Pynthorumkhrah Constituency ha ka elekshon MLA, Bah Rocky Hek u la buh jingkylli halor ka jingdon ki briew kiba pynphriang ia ka khubor ba un ym iakhun shuh ia ka elekshon kaban long shen ha u snem ban wan.
“Nga lyngngoh haduh katta katta ia ka jingphriang ki khubor ba la pynbna kylleng ba ngan ym iakhun shuh ia kane ka elekshon MLA ha u 2023 na Pynthorumkhrah,” ong u Bah Rocky haba kren bad ki lad pathai khubor.
Da kaba kam ba kitei ki dei ki khubor kiba thmu ban ialam bakla ia ki paidbah nongkyrshan jong u, utei u rangbah u la kyntu ia ki nongthep vote ba kim dei satia ban ngeit biej ia kum kitei ki khubor lada kim pat iohsngew markhmat ia ka jingpyntip na u kum u trai.
Watla haduh mynta um pat pynbna na kaei ka party ba un iakhun, u Bah Rocky u la pyntip ruh ba baroh shi katta u don lang bad ka National Peoples Party bad shen hi un pynbna paidbah ia kane ryngkat ka jingsynran lang jong ki paidbah nongkyrshan.
Na ka liang jong utei u rangbah u la kyntait ruh halor ka jingkynnoh ba katei ka jingmih jong u kadei tang ban khanglad ia ka jingiakhun para marwei hapdeng u Bah PN Syiem bad u kni jong u, u Bah AL Hek MLA ka BJP ba dei ruh u Myntri barim ka sorkar jylla.
“Kane kam don jingiadei ei ei ruh bad ka politik namar ka kam iing ka iaid la ka jong hapdeng jongngi, katba ka sainpyrthei pat ka dei la ka jong ym dei ban pyniakhleh lang,” u la ong.
Lah bna kdew hangne ba haduh mynta ki don lai ngut ki kyrtong kiba la mih shakhmat ban pynkhreh na bynta ka elekshon MLA kaban long ah u 2023 na katei ka constituency, kata kynthup ia u Bah PN Syiem ba dei ruh u MDC ka thain, nangta u Bah Hek bad mynta sa u pyrsa jong u Bah Hek, Bah Rocky Hek.
