Shillong, Rymphang 19: U Returning Officer (RO) ka Umroi constituency ula phah daka Show Cause Notice sha u MLA bad kyrtong ka All India Trinamool Congress (AITC) na Umroi bah George B.Lyngdoh bad ia u Election Agent u bah C Longmanbha Masharing.
Ia kane ka Show Cause Notice la phah halor ka jingkynnoh ba u bah George ula pynkhein iaki kyndon jong ka Model Code of Conduct (MCC).
Ha kane ka Show Cause Notice la phah halor ka jingkynnoh ba kila pynlong iaka jingialang khlem da shim jingbit na ki bor ba khmih iaka elekshon. La ong ba kila pynlong jingialang hapoh ka shnong Umket haka por 10 baje mynstep khlem da ioh jingbit.
Ka Notice bala phah sha u bah George bad sha u bah Masharing ka kdew ruh ba kila pynlong jingialang hapoh ka shnong Umsarang haka por 10 baje mynmiet bad ka jingpyndonkam iaki tiar pynsawa (PA system) wat haka por da miet.
“Kane ka long bala pynkhein iaki kyndon ka MCC bad iaki kyndon jong ka Representation of Peoples Act 1951 and Guidelines,” la ong ka hukum.
Ka Notice ka bthah ba kine baroh 2 ngut ki donkam ban jubab iaka Notice haka por 11 baje mynstep jong 20 tarik mynta u bnai sha u RO bad lada kim lah yn khein beit ba ki khlem jubab iaka Notice.
