Shillong, Rymphang 19 : Ki Pulit ka East Khasi Hills kila kem haduh 4 ngut ki briew kiba suba nongkhaii droks bad ioh kurup haduh 9.65 gram u heroin nalor ki 23 tylli ki mobile phone ia kiba la suba jur ba ki dei ki mobile tuh.
U Superintendent of Police MGR Kumar ula pyntip ba ka kynhun ki Pulit bala ialam da u SDPO Sadar ha ka 17 tarik Rymphang bad ka Special Cell, kila pynlong ia ka jingkhynra ha kylleng ki jaka Ka Nongbah Shillong kaba neh haduh ka step kaba bud bad ha kane ka jingkhynra kila ioh kem ia 4 ngut ki briew kiba suba jur ba ki dei ki nongkhaii droks.
Ha kane ka jingkhynra, ki Pulit kila ioh kurup ia shi synduk sabon u heroin ba khia 9.65 gram, 84 tylli ki tyndong plastic barit, 26 tylli ki thyrnia injek, bad 14 tylli ki tin golden ba thylli bad ka pisa ba T. 5920.
Nalor kane, u pyntip ba kane ka kynhun ki Pulit kila ioh kurup ruh haduh 23 tylli ki mobile phone kiba suba jur ba ki dei ki phone kiba shu tuh.
Ka jingtohkit mynta kala iaid shakhmat ban lap dien ia kane ka kynhun ka don bynta bad ki kynhun runar na kiwei pat ki Jylla ka Ri. U pyntip ba ia ki mobile phone yn sa pynphai noh sha ki trai hadien ba pyndep ia ki kam kat kum ki lynti jong ka ain.
