Tura, Rymphang 16 : Ka Election West Bengal kaba bun da ki jingiaumsnam, kala sdang mynta ha Jylla Meghalaya da ki jingjia thombor jong ki Nongtrei ka All India Trinamool Congress (AITC) ia ki nongkyrshan jong kiwei pat ki Seng.
Hynnin ka miet 15 tarik, ka jingkulmar ba shyrkhei kala jia biang ha Phulbari constituency, kaba dei ka sien kaba ar ban jia tang hapoh kane ka shitaiew tam, ia kaba la kynnoh ba ki Nongkyrshan ka Trinamool Congress jong u Kyrtong ka Phulbari SG Estamur Mominin, kila thaw jingkulmar bad thombor ia ki nongkyrshan ka NPP.
Kane ka huri hura kala jia hakhmat ka IIngsah u kyrtong ka TMC SG Estamur Mominin, ong ka khubor na ki Pulit.
Kat kum ka jingong jong ki, kane ka huri hura kala jia hadien ba kine ki Nongkyrshan ka TMC kiba don kumba 200 ngut eiei, kila ki pynsawa jam ia ki sur jingtem ha ka por 8 baje mynmiet, kaba la pyndik ia ki marjan marpa, kiba la ujor namar ka jingpynthut ia ki Khun ki Kti kiba dang pule kot ban pynkhreh iala ki jong ki eksam.
Hynrei la ong ba uwei u bahaiing jong une u kyrtong uba la bna nam kum u nongpynkulmar shnong, bala tip kyrteng da u Spofiqul Islam bad ba khot sin u Bhutto, ula ialam ia ki Nongkyrshan ka TMC bad leit shoh beit beit ia ki arngut ki nongmudui kiba la tip kyrteng u Md Joynal Abedin bad u Md Aynal Haque.
Haba ioh jingtip ia kane ka jingjia, ka kynhun Pulit ka Phulbari Police Station bala ialam da uSub Divisional Police Officer (SDPO) ka Dadenggre, kila leit mar mar sha kane ka jingjia bad haba poi ha ka jaka, kila shem ba palat 150 ngut ki briew kila ialum shabar ka Iingsah u Estamur bad lap ruh ia arngut ki briew kiba mynsaw kiba la batai ia ki Pulit ba kumno ki shah shoh ha u Bhutto bad kiwei.
Ki Pulit kila kem ia u Bhutto hynrei ki paidbah kila kerkut ia ki Pulit bad sdang ban thombor ia ka kynhun ban pyllait ia u Bhutto uba la phet krad na kane ka jaka. U Bhutto u dei uba donkti ha ka jingthombor ia ki Nongkyrshan ka NPP ba jia ha ka 7 tarik Rymphang ha Charbatapara. Une u runar ula shah kem bad la shah teh kyndon ha ka Iingkashari.
Namar ka jingiohphet u Bhutto, ki Pulit kila kem noh ia uwei u briew uba kynshoit ia ki paidbah ban thombor ia ki Pulit. Hynrei haba kaneka kynhun ka dang wan phai sha Police Station, ki nongkyrshan ka TMC bala ialam da ka kurim u Estamur ka Hasina Zaman, kila ker kut ia ka surok ha Bholarpita bad kila pyllait ia une u briew na ka kti jong ki Pulit.
Ki Pulit haba khatduh kila hap wan kit noh tang ia ki arngut ki briew ba mynsaw sha Phulbari Hospital bad shem ruh ba ki dang don sa arngut ki briew ba mynsaw, kiba la wan hi dalade sha hospital ban wad jingsumar hadien ka jingshah shoh ha kane ka juh ka kynhun.
Iwei na kine kiba shah shoh I dei I Khynnah Kynthei iba la kdiah ka kjat na ka jingshah shoh bad ia ine I khynnah la phah sha ki jaka sumar ba kham paka ba in ioh ia ka jingsumar.
Ki Pulit kila phah ia ka kynhun na Rajabala bad BHolarbita Outpost sha Phulbari bad ka jingthwet ia kine ki runar ba ioh phet tuh, ka dang iaid shakhmat.
Ki Pulit kila file ia ka suo moto FIR pyrshah ia kine ki briew bad kumjuh ruh kine kiba mynsaw kila ujor FIR haba jer kyrteng ruh haduh 32 ngut ki briew kiba thombor ia ki.
Kawei na ki daw halor kane ka jingthombor ka dei namar ba kine kiba mynsaw ki dei ki nongkyrshan ka NPP bad kiba la ju iatim iania ruh bad ki nongkyrshan ka TMC ha kane ka Shnong ban pynksan iala ki jong ki Party ba ki kyrshan.
Ha ka jingtohkit, ki Pulit kila shem ruh ba ha ka por ba ki Pulit ki wan poi ha kane ka jaka ba kulmar ban iarap ia kiba shah shoh, ki don ki briew kiba la phah khubor lyngba ka Whatsapp Group bala ai kyrteng TMC Phulbari Whatsapp group bad TMC District Whatsapp Group ba khot ia ki Nongkyrshan ba kin wan ban ialum paidbah.
