Pyllait u Nadda ia ka Election Manifesto ka Party
Shillong, Rymphang 15 : Ka Bharatiya Janata Party (BJP) hynne ka sngi Balang kala kular ha ka elekshon Manifesto ba kan pyntreikam ia ka 7th Pay Commission ha ka Jylla watla ka Jylla Meghalaya ka dang pyntreikam mynta ia ka 5th pay Commission.
U National President ka BJP JP Nadda ula pyllait paidbah hynne ka sngi ia ka manifesto/vision document jong ka Party bala ai kyrteng ‘empower Meghalaya’, haba kular ruh ban thaw ia ka ‘Special Task Force’ ka ban khlieh da u Judge bala sjongthait ka Supreme Court ban tohkit ia baroh ki kam bamsap ha Jylla bad ka Task Force ka ban tehlakam ia ki kam tih dewiong beain hapoh ka Jylla.
Kane ka manifesto ka kren ruh halor ka jingpynkupbor ia ki Kynthei da kaba ai 33% ia ki Kynthei ha baroh ki kam sorkar nalor ban pynkha ia ka Phan Nonglait Battalion, ka Battalion Pulit jong ki Kynthei ba nyngkong eh ha Jylla bad ruh ban sam ei da ki scooty ia baroh ki samla pule kynthei kiba pass bha shakhmat.
Haba kren ha ka jingialang, u Nadda ula ong “Ngi la rai ha ka manifesto jong ngi ban pyntreikam ia ka 7th Pay Commission ha Meghalaya bad ka tulop jong ki Nongtrei ruh yn sam ha ka por kaba biang khnang ba ki nongtrei kin lah ban trei bha ia ka kam”.
Haba pynpaw ba ka don ka jingiakhun kaba la sdang hapoh ki Jylla ka thain Shatei Lam Mihngi ha ki kam pynroi, u Nadda ula ong “Ka Meghalaya ruh kala pyrshang ban iakhun hynrei hangne ka kam bamsap ka dei ka kam kaba la pyndkoh haba phai sha ki kam pynroi”.
U Nadda ula ong ba ka BJP kala rai ban pynkha ia ka Special Task Force bala khlieh da u Judge bala shongthait ka Supreme Court, ka ban tohkit ia baroh ki kam bamsap ha Jylla.
“Ngin thaw ia ka Task Force ban tehlakam ia ki ka tih marpoh khyndew ba beain ha ka Jylla” ula ong haba kular ban pynsdang noh ia ka jingtih dewiong da ka jingstad saian shisien ba ka party ka shah jied ban wan ha ka bor.
Une u Khliehduh ka BJP ula kular ruh ba ka BJP kan sa pynbeit noh ia ki jingiakajia pud hapdeng ka Meghalaya-Assam ha ryngkat ka jingiatreilang bad ka Sorkar Pdeng nalor ka jingbuh ia ki Outpost ban peit ia ka jingshngain bad ka jingtreikam ka ain.
“Ngi ngeit ha ka jingiakren. Kam dei ka Bharat (India) bad Pakistan, ka dei ka Assam bad Meghalaya. Namar kata, lyngba ka jingikaren ngin pyrshang ban peit ia ka bad da ka jingkyrshan ka Sorkar Pdeng, ngin pynbeit ia baroh ki jingiakajia pud bad sa pynieng ia ki Outpost” ula ong.
Haba kular ia ka jingkoit jingkhiah ia baroh, u Nadda ula pynbna ia ka rai jong ka party ban kyntiew arshah ia ka Health Insurance jong kawei pa kawei ka Longiing n aka T. 5 lak sha ka T. 10 lak lyngba ka Ayushman Bharat.
“Ngin pyntreikam ia ka Meghalaya Health Insurance Mission da ka jingkynshew pisa ba T.2500 klur ban tei ia ki Medical College bad kiwei kiwei ki jaka sumar hapoh ka Jylla” ong ka manifesto haba bynrap ba ka party kan pyndap ruh ia baroh ki kam ba lait thylli ha ka kam doktor, nos, lab technician bad paramedical staff.
Nalor kane, u Nadda ula pyntip ba ka BJP kan wanrah ruh ia ka Karnesh Marak Youth Sports Scheme ban ai song pisa ba mar T, 1000 shibnai sha ki graduate ba khlem kam ka ban long haduh 1 snem, ka ban iarap ia ki ban leit pule ia ki kyrdan ba kham shajrong lane ban iakhun ia ka kam sorkar.
Ka BJP kala kular ruh ban pyntreikam ia ka Silverine Swer Academic Excellence Scheme ban ai sha ki samla ba pass bha jong ka klass XII da ki smartphone.
Une u nongialam ka BJP ula ong, ba ka party kan pyntreikam ruh iaka skhim naka bynta ki longkmie kiba kamai marwei bad ia kiba la iap lok ba kin ioh pdiang T.24,000 shi snem bad yn ai ei 2 tylli ki LPG Cylinder sha ki nongioh jingmyntoi lyngba ka PM Ujjwala Yojan, yn ai ei ia u khaw, shini, mluh bad u kew sha kito kiba ioh iaka rashon.
Ula ong, yn pyntreikam 100 % iaka PMAY na ka byntaban pynshna iing ia ki nongshong ha ka jylla bad yn ai jingiarap T.3000 naka bynta ki nongrep ki bym don jaka, ban ai jingiarap T.6000 ia ki nongri dohkha, yn mang kam 30% na ka bynta ki kynthei, yn pynkiew arshah iaka Pension bad kiwei kiwei ki jingkular.
U Nadda ula ong ka BJP ka kwah ban pynlong iaka jylla Meghalaya kaba lait na ki kam bamsap bad ula kob da kaba ong, ba dei tang ka BJP kaba bat bad kaba pyntreikam iala ka kular.
