Shillong, Rymphang 08 : Haduh 10 ngut ki briew kila mynsaw na ka jingkulmar kaba mih hapdeng ki Nongkyrshan ka All India Trinamool Congress (AITC) bad ka National People’s Party (NPP) hynnin ka miet sngi ba-ar hapoh ka shnong Bharbatapara, kaba hap hapoh ka Phulbari Constutuency, West Garo Hills.
Kat kum ka khubor na u District Election Officer, West Garo Hills, kane ka huri hura kala mih namar ka jingpyni bor jong ki Nongkyrshan ka AITC ia ki kali ba shong u MDC ka NPP u Habibur Zaman lem bad ki nongkyrshan kiba dang iaid lynti na kane ka shnong.
U DEO u pyntip ba kane kane ka huri hura kala jia ha ka por 10:45 mymiet bad la pyntip ba ha kane ka jingjia, u MLA barim SGE Mominin uba dei u kyrtong ka TMC, u Moni Mondal (TMC) bad Bhuttu (TMC) kila iadonlang.
U DEO u pyntip ba ula ioh pdiang ia ka ejahar na u Nozim Hussain ba kynnoh ba ki briew u MDC ka NPP kila wan sangeh hajan ka Iingsah jong u bad kawang maw ia ka Iing jong katba ki Nongkyrshan ka TMC ki dang pynlong ia ka jingialang bad namar kane, haduh 4 ngut ki brew kila mynsaw.
U pyntip ba ha ka jingtohkit la lap ba ka daw kaba pynmih ia kane ka huri hura ka dei namar ka jingjrong kti ki Nongkyrshan ka TMC ia ka kali (Scorpio) ba shong une u MDC ka NPP Habibur Zaman lem bad ki Nongkyrshan kiba dang iaid lynti na kane ka shnong.
Ia ki briew ba mynsaw la kit noh sha Phulbari CHC bad la pyllait noh ia ki hadien bala dep pyntah dawai.
U DEO u pyntip ba namar kane ka jingjia, ula phah mynta ia ka SDO bad SDPO ha ryngkat ki BDO ban leit sha katei ka jaka ban khmih ia ka jinglong jingman bad la buh ruh ia ka pyrton CAPF ba kan khmih bad tehlakam ia ka shongsuk shongsain.
U DEO u pyntip ba baroh ki nongpynkulmar kin shah pynngat hapoh ka kyndon CrPC 107. Ula pyntip ruh ba ula phah mynta haduh 3 pyrton ki CAPF ban tehlakam ia ka shongsuk shongsain ha baroh ki jaka them jong ka District.
