Guwahati, Rymphang 08: Laingut ki briew ki la shah kem noh namar ka jingshim ia ka ain hala ki jong ki kti, kata ha kaba iadei bad ka jingjia shah thombor kaba la jia hapoh Hailakandi district ka Assam ha kane ka sngi ba Ar ba la lah.
Ia kine ki laingut kiba la shah kem la tip kyrteng kum u Nizamuddin Borbhuyan, Aklashuddin Barbhuiya bad ka Salma Begum Barbhuiya.
Kane ka jinglong jingman ka la wan long ruh hadien ba u DGP ka Assam u GP Singh u la kyntu ia ki pulit ba kin shim ka jingpynshitom pyrshah ia ki briew kiba donkti ha katei ka kam thombor.
“Halor ka jingsaphriang ka video jong ka jingpynshitom bein ha Hailakandi, u briew uba la shah kynnoh donkti hakhmat eh u Nizamuddin Borbhuyan u la shah kem noh ha ki pulit ka Hailakandi ha ryngkat ki laingut kiwei apt.Ym shim ka jingpynshitom pyrshah ia ki,” pynpaw u DGP ka Assam lyngba ka Twitter.
Lah ban kdew ba ha ka video kaba la saphriang la iohi ia uwei u khynnah uba shah teh ha uwei u dieng bad shah thombor ha uwei u briew.Ia u ‘niuhkhlieh jong u la khi noh bad une u briew u la leit pynjhieh ruh ha une u khynnah.
“Ngi la kem noh ia laingut ki briew halor katei ka jingjia.U briew uba la shah kynnoh donkti hakhmat eh u Nizamuddin Barbhuiya ruh u la shah kem noh.Kham hashwa la kem noh ia u ha kaba iadei bad ki kam khaii drok,” ong u SP ka Hailakandi u Nabneet Mahanta.
Haba kren sha ki lad pathai khubor, utei u lanot uba kyrteng u Biraj Paul u la ong ym tang ba u la shah thombor hynrei u la shah pynlehrain ruh hakhmat kiba bun balang.
“Nga la leit sha ka iingsah u Nizamuddin Barbhuiya ban shim ia ki saw tylli ki song jong u drok heroin uba shongdor T.2000.Nga la siew ha u T.2000 bad u la bthah ia nga ba ngan shim hi ia kine ki synduk hapoh kawei ka jaka ba la buh.Nga la leit peit sha katei ka synduk bad shim santylli ki song rit ha ka jaka jong sawtylli, ia kaba ka kmie jong u ka la sakhi.Da kaba sngewthuh ba kila iohi ia kane, nga la bret noh ia kawei napdeng ki santylli ki song bad nga la shah ba kin talasi,” ong u Biraj Paul.
