Shillong, Rymphang 07 : Haduh 379 ngut ki kyrtong kila mih sha ka lympung ban aireng ha ka elekshon jied nongthymmai ba thymmai sha ka Iingdorbar Thaw Ain ka Jylla na ki 60 tylli ki constituency ka Jylla, ka ban long ha ka 27 tarik mynta u bnai bad napdeng kine, haduh 37 ngut ki dei ki kyrtong Kynthei.
Kitei ki kyrtong kiba la pyndep iaka jingthep kyrteng kin iakhun na ki seng sain pyrthei bapher bapher kiba kynthup iaka NPP, Congress, UDP, AITC, BJP, HSPDP, VPP, PDF, GNC, JDU, RPI bad ki kyrtong khlem seng ne Independent.
Ka jingthep kyrteng ki kyrtong kala sdang haka 31 tarik u Kyllalyngkot bad kala kut noh hynne ka 7 tarik u Rymphang bad ka jingbishar ia ka jingthep kyrteng ki kyrtong kan long ha ka 8 tarik u Rymphang.
Ka East Khasi Hills kaba don 17 tylli ki constituency ka dei kaba don bun eh ki kyrtong ba mih aireng-kaba kot sha ka 102 ngut bad napdeng kine, 14 ngut ki dei ki kynthei.
Ka West Garo Hills ka don haduh 65 ngut ki kyrtong kiba la thep kyrteng hynrei tang 4 ngut ki dei ki Kynthei.
Ka Eastern West Khasi Hills kaba don 2 tylli ki constituency ka dei kaba duna eh ha ka jingmih ki kyrtong, kaba long tang 7 ngut baroh lang kynthup arngut ki Kynthei.
Ha Ri-lum Khasi Jaintia, kiwei ki District ki long ka West Jaintia Hills-27 ngut ki kyrtong khlem ki kynthei, ka East Jaintia Hills -10 ngut ki kyrtong kynthup 3 ngut ki kyrtong kynthei, Ri-Bhoi-28 ngut ki kyrtong kynthup 7 ngut ki kynthei bad West Khasi Hills-21 ngut ki kyrtong khlem ki kynthei.
Ha Ri-lum Garo, kiwei ki District ki long ka North Garo Hills- 24 ngut ki kyrtong khlem ki kyrtong kynthei, East Garo Hills- 16 ngut ki kyrtong kynthup 2 ki kyrtong kynthei, South West Garo Hills- 12 ngut ki kyrtong kynthup 3 ngut ki kyrtong kynthei bad ka South Garo Hills-16 ngut ki kyrtong khlem ki kytrong kynthei.
Ka jingbishar kyrteng jong kine ki kyrtong kan long lashai ka sngi bad ka jingiathep vote kan long ha ka 27 tarik Rymphang. Ka jingniew ia ki vote kan long ha ka 2 tarik u Lber.
