Nongstoiñ, Rymphang 7: Ka seng KSU West Khasi Hills ka la lap ïa ka jingkynnoh thung kam sop sop ha ki ar tylli ki Tnad khlem da khot interview kata ha (SE) PHE bad ka Office DMHO.
Ka seng ka la lap ba kitei ar tylli ki tnad sorkar ki la pynrung kam khlem jingtip jong u Deputy Commissioner kum u chairman jong ka selection committee. Kitei ki ar tylli ki department ki la ïaid lait khlem khot interview haduh 19 tylli ki post ba lah sanction katkum ka jinglap jong ka seng.
Halor kane, ka seng ka pynpaw ka jingbitar namar katei ka jingleh jong ki Officer kitei ki ar tylli ki department, ka la pynduh jingkyrmen ïa ki samla wad kam wad jam ha West Khasi Hills.
U President Bah John Fisher Nongsiang ula dawa ïa u DC ba u dei ban weng kam ïa kitei ki briew kiba la thung sopsop ha kitei ki office bad dei ban khot interview thymmai. Ula ong ba lada na ka liang u DC bad kitei ki tnad kim patiaw halor kane, na ka liang ka seng kan sa leh ïa kaba donkam.
