Shillong, Jylliew 27: Ka Congress hynne ka sngi nyngkong kala dawa ia ka sorkar National Democratic Alliance (NDA) ba ialam da ka BJP ba kan pyndam noh mardor ia ka skhim pynrung kam shipai- ka Agnipath.
Kane ka jingdawa kala mih na ka “Satyagraha” ba la pynlong da ka Meghalaya Congress Committee (MPCC) ryngkat bad ka State Mahila Congress Committee (SMCC) ba long ha Shillong.
Ka congress kala ong ba ka ieng ha syndah ki samla jong ka Ri bad ” Ngi kular ban iada ia ka hok bad ka bha ka miat da kaba iakhun ban pynduh pyndam noh ia ka skhim (Agnipath)”.
” Ka sorkar Pdeng ka dei ban pyndam noh ia ka Agnipath policy namar kan SA pyntroin ia ka jingshngain jong ka Ri” kala dawa.
” Ka jingai jinghikai ba tang hynriew bnai kat kum kane ka policy kam pat biang satia ia ki shipai ban leit tur sha ki madan thma bad ban phah tur ia ki shakhmat. Kane ka dei ka bym lah ban pdiang satia” kala bynrap.
Ka congress kala pynpaw ba ka long kaba shaiong ba ka sorkar kala wanrah ia kum kane ka skhim ha ka por ba dang iai bteng ka jingkyntur pud jong ki shipai China ha khappud.
