Shillong, Jylliew 27: Ka National People’s Party (NPP) ka la phaikhmat mynta ban pynsuhthied ia ka party ha Mylliem Constituency, ban pynkhreh ia ka elekshon MLA 2023.
U National President ka NPP Conrad Kongkal Sangma uba dei ruh u Myntri Rangbah ka Jylla, u don ka jingangnud ba ka NPP kan lah ban sei ia u MLA na kane ka Constituency haka elekshon ban wan.
Lah ban kdew hangne, u Myntri Rangbah ka Jylla bad ka Iing ka sem jong u, ki dei ki nongshongshnong ba pura jong ka shnong 3 mer shiteng, Upper Shillong.
Haba iakren bad ka Shlem hynne ka sngi nyngkong, u Myntri Rangbah ka Jylla ula ong ” Ka NPP kan ialeh ban sei kyrtong ha baroh ki constituency ka Jylla kynthup ka Mylliem. Kane ka dei ka thong jong ka party”.
Haba kylli, u Conrad ula ong ” Ngi la thikna ban sei ia u kyrtong na Mylliem hynrei ngam pat kwah ban iathuh mano. Shu ap ia ka por bad phin sa iohi uba kumno uta u kyrtong”.
Ki jingiakren kila iaid sharum shaneng ba u MLA ba mynta ka Mylliem bad Myntri Sorkar Bah Hamletson Dohling jong ka seng Peoples Democratic Front (PDF), u lah ban pyniasoh noh sha ka NPP bad ban aireng ia ka elekshon MLA 2023 na ka ticket jong ka NPP.
Ka NPP kala buh ia ka Ophis treikam jong ka ha NPP- Mylliem Block kaba la buh ha Nongkseh, Laimer.
U National President ula leit iuhkjat hynne ka sngi nyngkong ha kane ka Ophis bad iakynduh ruh ia ki nongkitkam bad ki dkhot ka NPP-Mylliem Block.
Happy to visit party workers at the NPP Mylliem Block Office in Umlyngka, Upper Shillong. Call upon everyone to work dedicatedly for the people, upholding the values of the NPP. pic.twitter.com/wHntdXTWLe
— Conrad Sangma (@SangmaConrad) June 27, 2022
Tad haduh ba thoh ia kane ka khubor, ki kyrtong kiba la pynbna ban aireng ia ka elekshon MLA 2023 na Mylliem ki kynthup ia u MDC ka thain Bah RV Lyngdoh jong ka Congress, u MDC ka Laban Mawprem Bah Mitchel Wankhar u ban aireng na ma UDP bad ruh u MLA barim ka Mylliem Bah Pynshai Manik Syiem u ban aireng kum u kyrtong shimet.
