Shillong, Jylliew 27 : Hadien 32 snem ka jingphohsniew bad ka jingkhmih lynti, ka Umlyngka Primary Milk Producer Cooperative Society, ka la ioh la ka jong ka jaka buh dud ne ka Milk Collection Centre kaba la tei da ka jingkyrshan pisa u Myntri Rangbah ka jylla Conrad Kongkal Sangma bad u MLA ka Mylliem Bah Hamletson Dohling.
Ia katei ka Centre kaba la shna ha ka jinglut kaba la poi kumba 36 lak tam, la plie paidbah da u Myntri Rangbah ka jylla, Conrad K Sangma hynne ka sngi Nyngkong ryngkat ka jingdonlang u Bah Hamlet Dohling uba dei ruh u Myntri ha ka Sorkar Jylla.
In the presence of our dairy farmers, inaugurated the Milk Collection Center of the Umlyngka Primary Milk Producer Co-Operative Society Ltd. at Umlyngka, Upper Shillong funded through convergence of CMSDF & SRWP schemes.@PMOIndia @PRupala pic.twitter.com/t75ETRfZVf
— Conrad Sangma (@SangmaConrad) June 27, 2022
U Myntri Rangbah ha ba kren kum u Kongsan, u la ong ba ka sorkar kala iohi ia ka jingtbit jong ki nongshong shnong ban treikam lajong. “Hynrei kaei kaba ki paidbah ki donkam baroh shi katta ka long tang ban kyrshan ia ki khyndiat la ka long da ka jingkyrshan pisa, ka jingplie lad ia ka iew ka hat bad ruh ha ka jingbtin lynti,” u la ong.
U ong ruh ba ha ka por ba ki thaw ia ka sorkar jylla, ka bynta kaba ki buh hakhmat kam dei satia ban leh kano kano kaba thymmai hynrei ki kwah ban peit kaei kaba ki paidbah ki kwah ia ka sorkar ban leh bad dei kane hi kaba pynlong ia ki ban kyrshan ia kiba bun ki kam ba ki paidbah ki mait lynti.
U Myntri Rangbah u la iathuh ruh ba hadien ba u MLA ka thain u pyntip ia ka jingdonkam jongka Society khlem pynslem u la kular ban ai jingkyrshan pisa bantei ia katei ka centre.
U MLA ka thain Bah Hamlet Dohling pat u la ong ba hadien ba ka Society ka la ioh ia ka 27lak na u Myntri Rangbah ki shem ba ka pisa ka dang duna bad kumta hi mardor u la mang sa 9 lak na ka liang jong u ban ioh pyndep ia katei ka centre.
Ha kane ka sngi, u MLA ula kyrpad ruh ia u Myntri Rangbah na ka bynta ban mang pisa shuh ban shna pat sa kawei ka kamra ban ai jinghikai ia kito kiba kwah ban shim ia ka kam ri masi kum kawei na ki lad kamai kajih. Halor kane ruh u Myntri Rangbah khlem pynslem u la kular ban leh ia kaba donkam.
