TURA, Rymphang 02: Arngut ki kyrtong ka Ri-Lum Garo kila thep kyrteng ialade kum ki kyrtong sha ka elekshon MLA ban long ha ka 27 tarik Rymphang bad ki dei ruh kiba nyngkong eh ban pyndep ia kane ka kam napdeng ki kyrtong ha Ri-lum Garo.
Uwei na kine ki kyrtong u dei u Sarbha R Marak uban iakhun kum u kyrtong shimet na Dalu constituency, West Garo Hills kaba don ha khappud ka Bangladesh.
U Sarbha u dei uba pawkhmat bha hapdeng ki nongshongshnong ka Dalu bad u dei ruh uba iaknieh ticket hakhmat eh na ka All India Trinamool Congress, kaba la leit pynban sha uwei pat ki kyrtong.
Une u kyrtong un hap iakhun pyrshah ia u MLA ba mynta na ka NPP u Brening A Sangma.
Uwei pat u dei u Advocate Walseng M Sangma na Rongjeng constituency, East Garo Hills u ban iakhun kum u kyrtong shimet.
Une u Advocate uba iasaid ain ha Meghalaya High Court, Shillong, u dei u nongiakhun ba hakhmat duh pyrshah ia u MLA ka NPP u Jim M Sangma.
Ha ka Elekshon 2018, u Walseng ula liem ha u Jim Sangma tang 550 vote.
