Shillong, K’lyngkot 31 : Ka Liang Synshar National People’s Party (NPP) kan sa rai shen ban sei kyrtong ne em na Ranikor Constituency, hadien ba u kyrtong jong ka, u Martin M Danggo ula rai ban sa pyniasoh noh shen sha ka Bharatiya Janata Party (BJP) shuwa ka elekshon MLA ban long ha ka 27 tarik Rymphang.
U President ka NPP South West Khasi Hills District Bah Kitboklang Nongrem ula iathuh b aka Party kan sa khot noh mardor ia ka General Meeting jong ka party ha Rangthong ha ka 2 tarik Rymphang.
“Ka jingialang ka long ban thaw thymmai ia ka party bad ban rai halor u kyrtong. Ha kine ki sngi ban wan, u Danggo un sa ai ia ka shithi iehnohkam hynrei ngin ym lah ban ap namar ngi hap ban leh kloi ia ka kam” ula ong.
Haba pynpaw ba u Danggo ula shet kylla biang iaka NPP, u Bah Kitbok ula ong ba kane kam dei ka sien ba nyngkong ba une u MLA ula phet na ka party.
“Ha ka por ba u thmu iakhun ia ka elekshon MDC shiteng samoi hadien ka jingkhlad noh u Bah N Marwein, ha kato ka por u Danggo ula leit phai sha ka Congress. Hadien kata, ula wan phai biang sha ka party. Ngim poi pyrkhat ba kum kane ka jingjia kan wan jia biang bad un shet kylla ia ngi sa shisien” ula ong.
Kat kum ka jingong jong u, ki Nongialam ka Jylla kila pyrshang bha ban pynsngewthuh ia u Danggo ba un neh bad ka party hynrei ula kyntait ban sngap ia ka jingkyrpad jong ki bad khatduh ula rai ban kynthih sha kawei pat ka party.
U Bah Kitbok ula kyntait ruh iaka jingkynnoh jong ka Nongialam u Danggo Kong Pelcy Snaitang ba ki Nongialam ka party kila kyrshan ia u MLA ka United Democratic Party (UDP) Bah Pius Marwein namar ba kim kwah ba une u Lamphang barim ka Iingdorbar Thaw Ain un jop na Ranikor.
“Kam don satia ka jingshisha halor ka jingkynnoh ka kong Pelcy ba nga bad ka kynhun jong nga, ngi la pyrshang ban ialap pyrshah ia u Danggo ha kane ka elekshon ban wan” ula ong.
Haba kylli la u long uba kloi ban iakhun ia ka elekshon na Ranikor, u Bah Kitbok ula ong ba kane ka shong ha ki nongialam ka party bad ki nongkyrshan hynrei na ka liang ka jong u, um lah satia ban ong eiei namar ka party kam dei ka nongkynti shimet jong u.
Ula bynrap “Ngi don shibun ngut ki Nongialam ha ka kynhun jong nga bad khatduh ngin sa shim ia ka rai kat kum ka jingai jingmut na ki Nongialam jong ki Polling Station Committee bapher bapher”.
U Bah Kitbok ula kubur ruh baka jingshet kylla u Danggo khlem artatien kan don ka jingktah ia ka party ha Ranikor Constituency. “Ngim lah ban kyntait ia ka jingshisha ba lada ka iing ka sem ka pura, ka jingktah kan long ia baroh arliang-NPP bad u Danggo” ula ong.
