Agartala, Jylliew 27 : Ki nongialam bad ki dkhot ka Seng Congress ki la ngat ha ka jingshah thombor ha ki kynhun runar jong ka BJP ha Tripura hadien ba ka party liang pyrshah ka la ioh ia ka jingjop ha ka ilekshon shiteng samoi na Agartala assembly, kynnoh u heh nongialam ka Congress u Rahul Gandhi ha ka sngi U Blei ba la lah.
Ha kajuh ka por u Rahul u la dawa ruh na ka bynta ban shim ia ka jingpynshitom pyrshah ia kito ki briew ki ba donkti. “Nga pynrem jur halor ka jingshah thombor ki nongialam bad ki dkhot jong ngi ha ki runar ka seng BJP hadien ka jingjop na Agartala,”ong u Rahul lyngba ka Twitter.
“Ki paidbah ki don ryngkat bad ngi.Ka long ka jinglehrain ba ki bor pulit ki la shu ieng peitkai ha ka jaka ban pynsangeh ia ki nong thombor.Ki runar ka BJP ki dei ban shah pynshitom katkum ka ain,” ong u Rahul Gandhi.
Haduh kumba 19 ngut ki briew ka ba kynthup ia u heh ka Tripura PCC u Birajit Sinha ki la ngat ha ka jingmynsaw na ka jingiakynad hapdeng ki dkhot ka Congress bad ki nongkyrshan ka BJP hakhmat ka Congress Bhavan ha Agartala, kata hadien ba la pynbna ia ka result jong ka ilekshon shiteng samoi sha ki sawtylli ki assembly seat ha ka jylla.
Ha ka jingkren lyngba ka video na Guwahati, u heh ka AICC u ba dei khmih ia ka Tripura, u Ajoy Kumar u la kynnoh ba ka ophis jong ka seng Congress ha Agartala ka la ngat ha ka jingshah thombor ha ki nongkyrshan ka BJP.
“Ka Congress Bhavan ka don marjan ka police station.Hynrei, watla katta kine ki runar ka BJP ki la leh ia ki kam thombor da ka ba pyndonkam da ki tiar pynmynsaw bad da ka ba kawang maw.Phi lah ban mutdur ka ba kum kano ka jinglong jingman ha katei ka jaka,” u la ong shuh shuh.
U media incharge ka Congress u Asish Kumar Saha u la ong ba ki nongkyrshan ka party ki la wanphai sha Congress Bhavan ha ryngkat u kyrtong ka party u Sudip Roy Barman u ba la jop na Agartala ha ka por kumba 1 baje mynsngi.
Hynrei, katba ki dang pynkhreh ban ia bam ja sngi, ka kynhun ki nongkyrshan ka BJP ki la wan thombor hapoh Congress Bhavan.U president ka Tripura Pradesh Congress Committee u la shah thombor da ki maw na ki bynta jong ka khlieh, katba uwei pat u nongkyrshan Congress ia u ba la tip kyrteng kum u Romi Miah u la shah dung ha ki nongkyrshan ka BJP, ong u Saha.
