Shillong, K’lyngkot 31 : Ki Pulit ka West Garo Hills bad BSF kila ioh ban kurup ia u droks heroin ba shongdor haduh T. 2 klur ha ka jingtalasi kali hynne ka sngi hapoh lad Photmati, kaba hap hapoh Tikrikilla Police Station.
Kane ka kynhun ka Ain, kila ban kem ia uwei u briew ba kyrteng u Zakir Hussain, uba dei na Kusnimara, Mankachar District ka Assam. Une u briew ula mih na Goalpara Assam ban leit sha Mankachar ryngkat bad une u droks.
Ia une u briew bad u droks la kit noh sha thanad bad la pynngat ia u hapoh ka kyndon jong ka NDPS Act. Ka jingtohkit mynta kala iaid shakhmat.
Nalor une u droks, ki Pulit kila ioh ruh ban kurup haduh T. 12.47 lak tam ka pisa ha ka jingtalasi kali ha kylleng ki jaka jong ka District.
Kane ka jingtalasi kali ka long shibynta na ka jingpyntreikam ia ka Model Code of Conduct jong ka Election Commission of India (ECI).
La pyntip ba haduh mynta, ki Pulit ka West Garo Hills, kila ioh ban kurup haduh 30000 liter ka kyiad ba shongdor T. 1 klur lem bad ka pisa ba kot T. 46 lak.
