Nongpoh, K’Lyngkot 28 : Ki Nongialam bad ki Dkhot ka seng Hynniewtrep Youth Council (HYC) na Ri-Bhoi District kynthup ki Circle bad Unit, kila rai ban phet seng noh lane iehnohkam kum ki dkhot ka HYC namar ka jingshah jrongkti u President ka Ri-Bhoi District ha ki Nongialam ka Seng Kmie.
Kane ka rai kala mih na ka jingialang jong ka HYC Ri-Bhoi ba long hynne ka sngi saitjain ha shnong Umling, kaba la wan ia shimbynta da ki Nongialam ba hakhmat bad ki dkhot jong ki Circle bad ki Unit bapher bapher kane ka seng. Ia kane ka jingialang la pyniaid da u Samla Jason Nongrum, uba dei u President ka Ri-Bhoi.
Haba kren sha ki lad pathai khubor, u samla Jason Nongrum ula ong ba kane ka rai ka dei namar ka jingjrong kti khlem daw jong uwei u Nongialam ka Sengkmie bala tip kum u Donboklang Kharlyngdoh, ia ki Nongialam na Ri-Bhoi.
Kat kum ka jingong jong u, kane ka jingjia kala jia ha ka 12 tarik mynta u bnai haba ki Nongialam na Ri-Bhoi kila leit iashimbynta ha ka jingialang bala khot da ka HYC Sengkmie ban iapynbeit ia ki kam jong ka Ri-Bhoi. U ong ha kane ka sngi, ki Nongialam na Ri-Bhoi mar syn rung ha katei ka jingialang, une u Nongialam ka Sengkmie ula shu jrong kti jrong kjat khlem da pynshai ia ki daw.
“Ha ka jingtih bniah ia kaei ka daw kaba pynlong ia une u Nongialam ka Sengkmie ban pynibor, ngi la shem ba ka dei tang ka jingkwah pynibor ba khlem don nongrim hangno hangno ruh” ong u samla Jason.
U samla Jason u iathuh ba hadien ka jingiakren, kala don ka jingiasuk hapdeng jong ki, hynrei hadien ba ka khana kala pur sha ki Nongialam bad ki Dkhot jong ki Circle bad Unit, kane ka jingjia kala heh bad baroh ki sngew ba kane ka jingleh jong une u Nongialam kala ktah ia ka jingsngew jong baroh bad kyntu ba dei ban leh eiei mardor ia kane ka jingjia.
“Namar kane, ngi la iasyllok ia baroh ki para nongialam bad dkhot na ka District bad ngi la lum ia kane ka jingialang mynta ka sngi ban shim rai. Ka rai kaba mih ka long ba ngin iehnohkam kum ki dkhot kane ka Seng bad ia kane ka rai ngin sap hah sah ka HYC Sengkmie” ula pyntip.
