Shillong, Kyllalyngkot 25: U Chairman ka Grand Council of Chiefs of Meghalaya (GCCM) Bah John Kharshiing hynne ka sngi Balang ula leit buddien na ka Khasi Hills Autonomous District Council (KHADC) halor ki mat jingdawa ba iadei bad ka jingpynkylla noh ia ka Hima Mylliem Act 2007 bad ka rukom iaid ka synshar khadar ha kane ka Hima kynthup ka kam ban buh noh da ka rta shongthait ia u Khlieh Nongsynshar ha Hima, Raid bad ki Shnong.
U Bah John Kharshiing ula iakynduh ia u Executive Member (EM) ba khmih ia ka Tnad Elaka Bah Jambor War ban kylli pyrthew ia kaei kaba ka KHADC kala leh halor ki jingdawa ka GCCM.
Haba iakren bad ki nongthoh khubor, u Bah John ula pyntip ba ka jingwan iakynduh ia u EM ka dei na ka bynta ban buddien ia ki mat jingdawa ba kynthup ia ka jingpynbeit noh mardor ia ki jingdkoh hapoh ka Mylliem Act 2007, Mylliem Rule 2015 ka Appointment Act 1959 bad ka Appointment Rule 2015 KHADC kiba long ki daw jong ka jingklumar lut ka synshar khadar hapoh ka Hima Mylliem.
“Ka long kaba sngewsih…nga la phah lah bun tylli ki shithi hynrei ym don mano mano ruh na ki bor ka KHADC kiba kwah ban pynjanai ia ka Synshar Khadar ha ka Hima Mylliem” ong u Bah John haba kynthoh “Ka daw lehse ka dei kumba iatip baroh, ba ka Hima Mylliem kala kylla long ka ‘ATM’ jong ki katto katne ngut namar ka jingbun ka jingmih”.
Kat kum ka jingong jong u “Nga la ai jingmut ba ha ka Khasi Hills Autonomous District (Appointment and Succession of Syiem, Deputy Syiem, Electors and Rangbah Shnong of Mylliem Shyiemship ) Act 2007 dei ban don noh ka kyndon na ka bynta ka DORBAR THAW AIN HIMA MYLLIEM kaba 200 ngut tam ne duna, khnang ba ki kam baroh jong ka Hima naduh ka mang tyngka (budget) haduh ka kaiphod yn iatai shwa ha kane ka Dorbar Thaw Ain kaban ia kynduh shisien saw bnai”.
“Nga la ai jingmut ruh ba ka Executive Dorbar jong ka Hima Mylliem kam dei ban don tang 11 ngut kaba kynthup tang ia u Syiem bad ki Myntri, hynrei la donkam ban don lang sa 6 ngut ki nongmihkhmat na ki 16 tylli ki Dorbar Raid na Them Ri-Bhoi bad la donkam ruh ban don lang kumba 10 ngut ki Rangbah Shnong, 2 ngut nongmihkhmat na ki Seng Longkmie bad 2 ngut ki nongmihkhmat na ka Seng Samla Hima Mylliem, 2 ngut ki Legal Adviser bad 4 ngut ki riewshem phang jong ka Hima Mylliem. Dei ruh ban batai ba kane ka Executive Dorbar kadei ban shong dorbar la kumno kumno man ka bnai, bad ki dkhot kin long da ka pali man ka ar snem (lait u syiem bad u syiem khynnah)” ula bynrap.
Ka GCCM kala dawa ruh ba u Syiem bad kiwei kiwei kim dei ban bat sah iaka kam haduh ban da khlad noh hynrei dei ban buh noh da ka rta shongthait kaban long ia baroh ki nongsynshar Kur, Shnong, Raid bad Hima ba kin shongthait ynda kila dap 70 snem.
Haba kylli, u Bah John ula pyntip “U EM ula kular ba yn sa rah ia kine ki mat jingdawa jong ka GCCM haka komiti bad ba un salum ruh ia ka jingialang jong ki MDC kiba hap hapoh ka Hima Mylliem shuwa ban shim ia kano kano ka rai”.
