Shillong, K’lyngkot 25 :Ka Khasi Hills Autonomous District Council (KHADC) kala rai ban pynkylla noh ia ka Hima Mylliem Act, ka ban pynduh noh ia ka iktiar jongki Rangbah Shnong ki bym dei ki Khasi hapoh ka Hima kynthup ki Garo.
Ia kane la pyntip da u President ka Hynniewtrep National Youth Movement (HNYM) Bah Louis Dohtdong haba iakren bad ki nongthoh khubor, haba sot ia ka jubab jong ka KHADC halor ka jingdawa jong ka seng ban tohkit ia ka jingdie jaka jong ki Rangbah Shnong ki bym dei ki Khasi hapoh ka Raid Marwet.
Ka seng HNYM kala aipor ia ka KHADC ba kan leh eiei halor kane ka jingdawa hapoh ka 19 tarik mynta u bnai.
U Bah Louis u pyntip ba u EM ka Tnad Elaka ula phah ia ka shithi ha ka 20 tarik Kyllalyngkot sha ka HNYM ba pyntip ia ka sienjam ba ka Council kala leh halor kine ki mat jingdawa.
Kat kum ka jingong u Bah Louis, haduh 58 tylli ki Shnong jong ka Raid Marwet ki dei ki shnong kiba don ia ki Rangbah Shnong ki bym dei ki Khasi bad kine ki Shnong ki dei ki bashong basah da ki paid Garo.
“Ka Hima Mylliem bad ka Raid Marwet kila shim ia ka rai ban pynkhein noh ia ka iktiar jong kine ki Rangbah Shnong bad ba ka Hima kan thung noh da ki Circle Dorbar Shnong ha kine ki Shnong ha kaba yn sa thung noh ruh da ki Circle Rangbah Shnong ban khmih ia ka synshar ka khadar” ula pyntip.
U Bah Loius u pyntip ba ha kane ka jubab, u EM ka KHADC u pyntip ba ka Council kala rai ban pynkylla noh ia ka Mylliem Act 2007, da kaba bujli noh ia ka kyntien “Nongpyniaid Shnong” da ka kyntien “Circle Rangbah Shnong” ia kaba la mynjur da ka Hima Mylliem.
Ha kajuh ka por, u Bah Louis u pyntip ba ha ka 1 tarik u Nohprah, ka Hima Mylliem kala phah da ka jingthoh sha ki bor pyniaid District ka Ri-Bhoi ba kim dei shuh ban pdiang ia kano kano ka NoC bala ai da kiba kam Rangbah Shnong, haba iadei bad ka jingiadie khyndew sha ki bym dei ki Khasi haba kyntu ruh ba lada don kum kine ki kam, dei ban pyntip sha ka Hima ba kan leh ia kaba donkam.
