Nongpoh, K’lyngkot 25 : Lai ngut ki briew kila mynsaw na ka jingiatakhuh kali hapdeng ka Mahindra Scorpio ML05-AB-9933 bad kawei ka Trok NL01-N-6449 ha surok bah NH6, Ri-bhoi.
Kat kum ka khubor Pulit la iathuh ba kane ka Scorpio ka dei kaba hiar na Shillong sha Guwahati bad ka trok ka dei kaba kiew na Guwahati sha Shillong.
Kane ka jingjia kala jia ha ka thain Dulongnar namar ka jingphah iaid ia ki kali ba hiar na Shillong sha ka liang jong ka surok kaba kiew na Guwahati. Kane ka jingphah iaid sha shiliang ka surok ba kiew, ia ki kali ba hiar na Shillong ka dei namar ka jing maramot ia ka surok da ka NHAI.
Ki pulit ha ka jingtohkit kila shem ba ka jingaksiden ka dei namar ka jingniah khlem akor jong u nongniah ka trok ubym shym la lah ban tip kyrteng, uba dei ban niah ia ka kali na ka liang ka diang jong ka surok nalor ka jingniah sted.
Ki Pulit kila register case halor kane ka jingjia bad ka jingtohkit mynta kala iaid shakhmat.
